OPISYALES KAN CIUDAD DISGANADO SA SONA NI PRRD: Haen na an pangakong modernisasyon kan PNR?

Veinte dos na bulan nalang an natatada matatapos na an torno ni Presidente Rodrigo R. Duterte sa Malacañan alagad dai nasambitan sa saiyang ika-limang State of the Nation Address (SONA) kun pigpuponan na asin kun nuarin matatapos an saiyang pangako na implementasyon kan modernisasyon sa Philippine National Railways (PNR).

An pangako kan gobierno magkakaigwa nang Bicol Bullet Train Transport System sa irarum kan Build-Build-Build program ni Presidente Duterte oras na matapos an proyecto.

‘‘Very disappointing ‘’ dai ko na ngani tinapos an SONA dai lamang nasambitan an pigsasabing modernisasyon kan perrokaril na haloy nang piglalangkag kan mga Bicolano, sabi ni Bise Alcalde Cecilia ‘’Nene’’ De Asis, presiding officer kan Sangguniang Panlungsod kan Ciudad nin Naga.

Nagpangako an Presidente na tataposon an proyecto kan South Line alagad an mga taga premir asin segundo distrito kan Camarines Sur maging sa provincia nin Albay mayong naheheling na konstruksyon sa perrokaril.

Sinabi pa ni De Asis na dakulang bagay sa mga Bicolanong pasajero kun nagdadalagan na an PNR train huli ta barato pa an flete asin napapanahon ngonian na pandemya na paralisado man an viaje kan mga pampasajerong bus huli kan coronavirus disease (Covid 19).

Igwang viaje an train haling Manila pasiring sa Bicol alagad naghahatod sana nin Locally Stranded Individuals (LSIs).

Maging an pighahalat kan mga tawo kun ano an situasyon sa Covid 19 asin ano an saiyang plano, mayo lamang alagad an pigpapangako na masuplay an nasyon kan China sa Filipinas kan bakuna laban sa virus, sabi pa.

Si Consejal Vidal Castillo, pamayo kan Committee on Infrastructure sa SP nagsabi na bako lang taga Ciudad nin Naga an makikinabang kan regular na viaje kan train envez an mga taga digdi sa Bicol asin dakulang tabang pa sa lado nin economia sa pagtransportar kan produkto agricultural.

‘‘Marhay pa sa ibang rehiyon nasambitan an mga pig-iimplementar na proyecto sa irarum kan BBB’’.

Ano na si nangyari kan P175 bilyon na inutang sa nasyon kan China?. Katuyohan kaini nganing buhayon giraray an viaje kan train alagad sa bagong plano haling Manila abot na sa Matnog, Sorsogon an dalagan kan train, sabi pa ni De Asis asin Castillo.

Sa presente commuter train sana an nagdadalagan na train haling Sipocot pasiring sa Ciudad nin Naga.

Si Consejal Elmer Baldemoro nagsabi na an pighahalat na definidong plano kan administrasyon Duterte sa paglaban sa Covid 19 alagad dai ninda nadangodg envez nag-aasa sa China.

Tinawan niyang ‘‘6’’ an grado ni Presidente Duterte sa SONA.

Magigirumduman kan bulan nin Mayo 2019 nag-atubang sa press conference sa miembros kan media sa Ciudad nin Naga si PNR General Manager Junn Magno asin nagpapangako na tataposon an proyecto antes matapos an torno ni Duterte sa 2022 alagad mayo nang impormasyon sa kamugtakan kan proyecto.

Saiya pang sinabi na an south railway papaliputon an oras kan viaje na dating inaabot nin walong oras envez magiging nang tolos oras na igwang speed limit na 160 kilometer per hour asin barato pa an flete kumpara sa buses.

Haling Manila abot sa Ciudad nin Legazpi asin sa Sorsogon an konstruksyon kan proyecto tatawan nin prioridad na makatrabajo iyo an mga Bicolano, sabi pa kan general manager. (dpa)