SA CHA-CHA: Pandemya sinasabayan signature campaign

Kinukundenar kan progresibong grupo an pagmaniobra kan gobierno sa Cha-Cha sa paagi nin signature campaign.

Pahikap an ginigibo kan presenting administrasyon mantang nag-aatubang sa pandemya an nasyon alagad padagos an ginibong signature campaign nganing itulod an charter change sa paagi kan mga facilidad kan Department on Interior and Local Government.

Pang-oopurtonista an ginigibo kan DILG ngonian na may krisis sa salud sa tahaw kan paglaban kan gobierno sa coronavirus disease (Covid 19) alagad nasisibot man sa online signature campaign maging sa pagpirma sa residentes kan barangay.

Ini an mga pahayag ni James Casilihan, lider kan BAYAN MUNA sa Bicol asin an saindang panindugan dapat ibasura kan namamanuan an pigtutulod na cha-cha nin huli ta an motibo kan mga politico para sana sa saindang personal interest alagad dejado an namamanuan Filipino.

Sa ngonian haros kadakli nagiging gatasan kan elihidong opisyales an caja kan gobierno sagcod na digdi na sinda nagrarayaman kaya ngani habo nang magharale sa puesto lalo na si mga envuelto sa ‘’political dynasty’’.

Sa propuestong pag-enmienda kan 1987 constitution kinakaipuhan halion na an term limit kan mga elihidong opisyales nasyonal asin lokal asin an isyu sa economiya dapat tawan na nin buelo an dayuhan na inbestor envez gibohon nang 100 por ciento an saindang pagsasadiri hali sa dating 40-60 por ciento.

An opisina central kan DILG nagpaluwas kan saindang direktiva sa mga opisina rehiyonal na ipadagos an signature campaign sa paagi nin online maging pagpirma sa residentes asin target kan ahencia an dos milyones na pirma nganing madagos an Cha-Cha.

Papaagihon na sa congreso an pag-enmienda kan konstitusyon asin ini malinaw para sana sa sadiring interes kan mga politico, sabi pa ni Casilihan.

Saindang kinukundenar an arog kaining operasyon kan gobierno apesar na mayong konsultasyon sa mga Filipino sige sana an pagpa-pirma dawa an kadakli sa residentes kulang an pagkasabot sa isyu. (dpa)