Planong Libmanan-Canaman Bridge hagad buhayon, sabi

Calabanga, Camarines Sur – An Sangguniang Bayan sa banwaan na ini nakatalaan magpasar nin resolucion nganing huroton sa gobierno nasyonal na ipadagos giraray an na-pendienteng kunstruksyon kan tulay na mabalyong salog sa banwaan nin Libmanan pasiring sa Canaman.

Si Consejal Levy Sta. Ana kan SB Calabanga nagpahayag na maninigo na marealisar an bilyon pesos na cantidad kan tulay nganing makatabang sa lado nin economia na mapalipot kan viaje haling Manila pasiring sa aagihan na mga banwaan nin Libmanan, Canaman, Magarao, Bombon asin Calabanga maging sa Ciudad nin Naga.

Grabe na an hibog kan bulos nin trafico sa Ciudad nin Naga asin kaipuhan matabangan an pagtaraig na banwaan na miembros kan Metro Naga Development Council bako lang ciudad.

Maging an pagtaraig na banwaan pacil na an saindang pagtransporter nin produkto agricultural makakatabang pa pag-asenso sa ngaran na economia, sabi pa ni Sta Ana.

Igwa nang enot na resolucion an SB Calabanga na hinahagad ki 2nd district Congressman LRay Villafuerte bilang vice chairman kan appropriation committee sa Camara-Baja na ipadagos an saiyang planong proyecto nin tulay na puedeng magsumpay kan banwaan nin Magarao o Canaman.

Saen man na banwaan ibugtak an proyecto makakatabang pa ini sa viaje pasiring sa Calabanga, segun pa ki Sta Ana. An banwaan na ini sakop kan tercer distrito kan Camarines Sur saro sa nag-aasensong banwaan digdi.

An propuestong Libmanan-Canaman Bridge igwa nang dating fundo kan panahon kan dating 1st district Congressman Dato Arroyo sa panahon pa na an saiyang ina na si Gloria Macapagal-Arroyo iyo pa an Presidente kan nasyon.

Ginastosan na nin milyones peso an feasibility study kan proyecto kan gobierno nasyonal alagad dai na na-implementar kan maglaog an bagong administrasyon ni dating Presidente Benigno Aquino III. An feasibility study posibleng igwa pang kopya kaini maging si dating Diputado Arroyo. (dpa)