30% sana sa manga PUJs tinutugotan na magkayod

Sagcod sana sa anuncio an Inter-Agency Task Force na tinutogotan na an mga public utility na puon kan Agosto 1, 2020 puede nang magkayog alagad limitado sana sa treinta por ciento kan unit nin mga PUJs sa saindang kanya-kanyang ruta.

Kaipuhan man giraray magkua nin special permit sa Land Transportation Franchising and Regulatory Board (LTFRB), huli kaini dakul na mga tsuper nin PUV an nagkakagurotom.

Si Joel Pillogo, pamayo kan Condor-Piston sa Camarines Sur nagpahayag kaini sa entrevista kan Bicol Mail mantang an iba sa sainda naglalaom na makabali sa ika-duwang hornadang distribusyon kan Special Amelioration Program (SAP) kan Department of Social Welfare and Development (DSWD).

An iba sa sainda napipiritan na magkayog padyak, magtienda nin barbecue maging gugulayon mabuhay lang an saindang familya asin dai sinda nag-aasa sa pangako na makakarecibe pa nin SAP.

Alagad mayo pang plano na malimos arog kan mga jeepney drivers sa Metro Manila, sabi pa ni Pillogo.

Maging an mga public utility buses na naglalaom na makakayog sa paagi kan inter-regional routes alagad suspendido nganing makalikay sa padagos na paglangkaw kan caso sa coronavirus disease (Covid 19).

Ini contra sa mga enot na anuncio na tutugotan an mga viaje hali sa Bicol pasiring Manila ngonian na bulan. An suspensyon sa mga regional trips kasunod kan pagsunod sa guidelines kan Department of Transportation (DOTr).

An pagpabuelta sa operasyon kan buses sa rehiyon magdedepende sa desisyon kan IATF asin DOTr. (dpa)