Ex-GM kan Casureco IV bagong PDA administrator

August 14, 2020

 Si Atty. Vicky Briones nagsusumpa sa atubangan ni 4th district Congressman Arnie Fuentebella bilang bagong PDA Administrator.                                                                         (Audie Concina FB)            
 

Tigaon, Camarines Sur – Si Atty. Veronica ‘Vicky’ Briones, dating general manager kan Camarines Sur IV Electric Cooperative (Casureco IV) kan Partido area iyo na an nagtutukaw na bagong administrator kan Partido Development Administration (PDA) karibay kan nagretiro na sa serbisyo Ramon Fuentebella.


Epektibo an saiyang pag-asumir sa puesto kan Agosto 1, 2020 matapos aprobaran kan pamayo kan Government Own or Controlled Corporation (GOCC) an saiyang nombramiento matapos mabakante an posisyon sa PDA kasunod kan pagreretiro kan dating administrator.


Siya pinasumpa tolos sa puesto ni Congresista Arnie Fuentebella kan cuarto distrito kan Camarines Sur sa aldaw kan kumpleanyo kan saiyang pigribayan sa puesto.


Si Briones, aki ni dating Sagñay mayor Roberto Briones asin nagtukaw nin perang bulan bilang project supervisor sa dating maribok na Casureco II sa Ciudad nin Naga.


An  bagong  administrador tolos man nagconducir nin inspeksyon  sa Partido Water System na saro sa saiyang tatawan nin prioridad nganing mapaangat an serbisyo sa consumedores alagad kaipuhan ipa-audit an operasyon kaini.


Pig-aadalan pa kun kinakaipuhan mag-imponer nin dugang na tarifa tanganing mas mapakarhay an mga facilidades kan water system.


An PDA, pigprobaran na tunawan kan Sangguniang Panlalawigan kan Camarines Sur sa ika-duwang termino sa puesto ni Gobernador Migz Villafuerte sagcod na inaprobaran kan Malacañan alagad pigcuestion sa corte kan mga opisyales kan PDA na sagcod sa ngonian pendiente pa an asunto sa Corte de Apelacion.
Nangyari an controvercia sa PDA antes kan eleksyon lokal kan taon 2019.


Nangyari  an  pagprobar na tunawon kan nakatutukaw pa bilang Congresista kan 4th district si dating Congressman Arnulfo Fuentebella asin saiyang pigcuestion ini nganing madara sa jusgado mantang  motivo pulitikal an saindang naheheling na rason kan Capitolyo Provincial.


Huli kaini, padagos an operasyon kan PDA sagcod na nagnombra nin bagong administrator an GOCC.


An PDA natugdas sa paagi nin Congressional Act kan panahon ni dating Deputy Speaker Arnulfo Fuentebella.  (dpa)

Share on Facebook
Share on Twitter
Please reload