Ama Niamo
Tiyaya, bagsak an ekonomiya kan Pilipinas ta nagbulusok ini huli sa Covid-19.
Milyones an mayong trabaho, dakol na negosyo an nag-ontok lalo na duman sa Metro Manila asin nakapalibot na mga lugar huli sa GCQ, ECQ, MECQ na nagkaralaom an kadaklan sa laog kan saindang mga harong tanganing dai magka-orulakitan ta nagwarak na an coronavirus desease.
Natanyog an gobyerno nasyonal pati mga gobyerno lokal sa bilog na nasyon.
Dakol na an nanganglabado pati mga tsuper nin jeepney asin bus duman sa Metro Manila. Dakol an nagrereklamo na sinda mayo nang kinakakan, gurutom na an saindang pamilya.
Gulping tinamaan kan Covid an mga lugar na mahibog an populasyon arog kan Mega Manila, CALABARZON, Central Luzon, Cebu asin mga provincias asin mga ciudades na dakol an tao duman sa Mindanao. Ginigibo man an gabos kan gobyerno sa pangengenot ni Presidente Duterte, an Department of Health, Inter Agenceny Task Force (IATF) for emerging diseases asin kan local government units sa provincias, ciudad asin banwaan tangarig makontrol an paglakop kan helang na nakakagadan.
An Congreso (Senado asin Camara baja) hinihimo man na makapasar nin leyes arog kan Bayanihan Acts 1 and 2 asin makapaluwas nin pondo na iaayuda sa mga biktima, pambakal nin mga gamit arog kan testing kits, mga bulong na mamahalon asin pagmantenir kan mga medical support staff sa manlaen-laen na ospital kan gobyerno asin kan pribadong sector.
Limang bulan na kan mag-quarantina asin lockdown kita poon kan kabangaan kan Marso 2020 sagkod ngonyan pero yaon pa man giraray an virus na nakakaabot na pati sa mga provincias arog digdi sa Kabikolan.
Haradit an mga tao, kabado na an gobyerno kun papano-hon an pag-untok kan krisis na ini na primerong nangyari sa estorya kan Pilipinas.
Inako na kan gobyerno nasyonal na opisyalmente igwa na nin economic recession o talagang lugmuk na an ekonomiya asin pagbuhay kan nasyon.
Nadagdagan pa ngonyan kan bareta na nagsungaw asin pig-iimbestigaran na sa Congreso na grabe an korapsyon sa Philhealth, an ahensya na nakakatabang kuta sa pagsalo kan mga gastuson nin tao sa pagpabulong asin pagbakal nin bulong kontra sa Covid asin gabos na marati-on kan gabos na namamanwaan suboot nawawaraan na nin bilyones pesos na fundo asin tibaad sa taon 2022 masarahan na an importanteng ahensyang ini kan gobyerno. Parano na kita.
Mientras tanto, padagos an iringan, siriwagan nin laboy kan oposisyon, kan kritiko kan administrasyon sa sarong lado asin siyempre an mga nasa gobyerno na bako lang nagsisimbag kan mga akusasyon o nagdudupa sa gobyerno kundi nag-aakusar man sa mga kalaban nin sobrang pamomolitika.
Bako lang maharang na an mga tataramon kundi bastos na arog kan paggamit kan terminong bobo, estupido asin gago sa lambang saro.
Sa tahaw kan pandemya gusto kan oposisyon na ribayan na an administrasyon asin pabagsakon particularmiente si Presidente Rodrigo Roa Duterte.
Bako lang imposible yan na mangyari apuera kun por medyo sa pig-aapod na “by-operation of law”.
An tarabugaan asin murudahan sa social media asin mainstream media abot na sa kaitaasan, makulog sa mata asin nakakabungog na sa talinga.
Huna ko baga Katoliko asin Kristiyano kita, solamenteng Katolikong nasyon sa enterong Asya. Bako lang sa aksyon asin taram kundi sa hiro-hiro kan satuyang mga lawas. Maski an mga lideres kan simbahan nagtapsok na sa kontrobersiya.
Pigsasabi na numero uno na an kaso nin Covid sa Pilipinas daog na an ibang nasyones sa South East Asia pati an pinakagulping populasyon na Indonesia na pinakadakulang nasyon nin mga Muslim sa enterong kinaban.
An Covid lakop sa enterong kinaban sa pangengenot kan Amerika.
Pero bako ining parareha o paerenotan kun siisay an number one sa bilang nin mga kaso asin numero kan mga positibo asin mga gadan.
Gabos nag-aapura na makahanap nin bulong kontra sa helang na dai naheheling pero dai ini madali-dali maski kan mga asensadong nasyones kan mundo.
An kaipuhan ta ngonyan bakong mag-iriwal asin magturuklingan kundi magtarabangan o magturuwang kasabay an pagpangadie sa Mahal na Diyos kan “The Lords Prayer” o “Ama Niamo”.