DILG mayong ginigibong pahikap na signature campaign sa Cha-cha

Dai nagsasabay sa pandemya an Department of Interior and Local Government (DILG) sa signature campaign pabor sa pigtutulod na Charter Change kan presenting administrasyon asin an sainda sanang trabajo iyo an advocacia.

Sa entrevista sa paagi nin telepono kan Martes na hapon, Agosto 11 ini an piglinaw sa Bicol Mail ni Camarines Sur DILG Provincial Director Melody Relucio sa pagdenuncia kan Bayan Muna na dapat isikwal an Charter Change na an ma-enmienda sana iyo an congreso huli ta ini malinaw na ‘self serving’.

Sinabi pa ni Relucio kan nakaaging Febrero 2020 nagkaigwa na an saindang ahencia nin road show asin orientation sa University of Nueva Caceres sa presencia ninda Usec Jonathan Malaya asin dating Bise Governador Ato Peña na nagtatrabajo na sa DILG central office.

Mayong ginigibong panghihikap sa signature campaign mala ngani ngonian na pandemya iginilid muna asin naghahalat sinda kan direktiva hali sa central office.

Yaon na ngonian sa mga LGUs kun saindang ipapadagos an signature campaign.

Piglinaw pa kan DILG Officer na voluntad an saindang ginigibo alagad ngonian na may pandemya iginilid muna asin nagpuon sana sinda sa paagi nin road show kan bulan pa nin Febrero ngonian na taon.

Sa Libmanan, Camarines Sur sinabi ni DILG Officer Relly Peñaredondo na mayo man sindang ginigibong actividad sa signature campaign sa tahaw kan padagos na paglangkaw kan caso sa Covid 19.

Sa mga protest rally kan progresibong grupo saindang pigpapahayag an pagcontra sa Charter Change huli ta an makikinabang sana kaini iyo an mga pulitiko.

Kabali sa plano sa pag-enmienda kan 1987 constitution iyo an reforma pulitikal asin economia. (dpa)