Mga paratukdo ginibong malimos kan DepEd

Ginibong malimos kan Department of Education (DepEd) an mga paratukdo mantang kulang an saindang fondo na gagamiton sa learning materials kan mga estudiante sa burokasan nin klase sa Agosto 24.

Sinabi ni DepEd Regional Director Gilbert Sadsad sa ngonian an mga paratukdo pinapatipon nin mga donasyon para sa alcohol, face shield, coupon bond asin iba pang materyales para sa modular learning na kaipuhan an printed materials na gagamiton kan ribo-ribong estudiantes sa escuelas publica.

Dai na prioridad an Brigada Eskwela ngonian na taon alagad an magurang kaipuhan magdonar na sana depende sa saindang kakayahan siring kan coupond bond asin iba pa bilang ayuda sa kaipuhan na learning materials.

An dahilan segun sa DepEd Bicol an nakatalaan na blended learning dai kabali sa napundohon ngonian na 2020 mala ngani si alokasyon sa ngonian hali sa pig-realigned na fondo kan ahencia na nag-aabut sa Php9 bilyones sa dapat na kaipuhan na P40 bilyones sa enterong public school sa nasyon.

Digdi sa Bicol on cuarto lang an saindang fondo na nagcacantidad nin P668 milyon asin down loaded na digdi.

An mga lokal na gobierno sa paagi kan school board nag-aandam man na magtabang sa mga escuelas publica nganing mahipnoan an kakulangan kan ahencia sa burokasan nin klase.

An inaatubang na kakulangan na ini kan DepEd huli kan pandemya mala ngani apektado man an enrollees sa mga private school.

Sa isyu sa posibleng pag-uktaba kan burokasan nin klase, sinabi pa ni Sadsad na mayo pang pagbabago envez sa Agosto 24 man giraray.

Sa ngonian nagpapadagos pa an pagpalista nin mga estudiantes dawa na ngani nagtapos na si enrollment period kan Hulyo 15 para sa school year 2020-2021.

Katuyohan kaini nganing matawan pa nin panahon na makaklase sa ngonian na school year.

An DepEd Bicol igwang total na 1.5 milyon na enrollees hasta kan huring aldaw kan enrollment kan Hulyo 15 na mas hababa nin 300,000 kumpara sa 1.8 milyon na enrollees kan nagtalikod na taon. (dpa)