ANTES KAN 6.6 MAGNITUDE EARTHQUAKE: Masbate, pinamate na

August 22, 2020

Cataingan, Masbate – Perang aldaw antes nangyari an makusog na 6.6 magnitude earthquake kan Martes na aga sa banwaan na ini namate na kan mga residente digdi an apat na veces na paglinog sagcod nabigla sinda kan makusogon na linog alas 8:03 nin aga kan Agosto 18.


Dakul an nadestroso asin nagkagarabang kaharongan sa gabos na 36 na barangay kan Cataingan maging nag-crack na tulay, tinampo, edificio kan gobierno asin simbahan.

An Philippine Institute of Seismology and Volcanology nagpahayag na an epicenter kan linog iyo an Cataingan mala ngani sagcod kasoodma namate pa kan mga residente an maabot na sa 60 an aftershocks kaya padagos sinda nag-aatubang nin kahaditan.


Ini an mga pahayag sa Bicol Mail ni Rammel Abiga, registrar kan Cataingan Community College asin residente kan Malobago, harani sa centro kan banwaan.


Premirong nangyari sa saindang banwaan na kinabigla kan mga tawo sa tahaw kan pandemya alagad nadagdagan pa nin calamidad.


Sinabi pa ni Abiga nin huli ta natatakot pa an mga residente nagtuturog sa luwas kan saindang harong asin an iba harayo na an distancia sa mga edificio. Nabugtak nalang nin tent dai lang mauranan asin mainitan sagcod na okupado an tinampo na dai maagihan vehiculos mantang garatak huli kan linog.


An Cataingan National High School ginamit muna bilang temporaryong evacuation center kan nagabaan nin mga harong.


Sarong retiradong colonel kan PNP an binawian nin buhay matapos madaghanan kan saindang nagabang harong.


Paralisado an viaje sa ibang mga mayor na tinampo huli kan mga crack mantang cancelado an viaje sa dagat matapos madestroso an Puerto.


Si Principal Rebecca Delabajan kan Santos Edem Conag National High School asin residente kan Cataingan nagsabi man haros enterong pigyugo-yugo an saindang residencia asin nabigla an saindang familia.


An saiyang escuelahan namumugtak sa Esperanza, Masbate kabali man sa mga municipio na apektado kan makusog na linog alagad mayo man na gayong destroso envez mga nagkahurolog sanang plato, baso, nahulog na mga gamit sa estante asin iba pang sadit na danyos.


Alagad an ibang mga residente pagkabanggui nagtuturog sa luwas kan saindang harong mantang nakakamate pa nin paghadit.

Share on Facebook
Share on Twitter
Please reload