Limang banwaan sa CSur idedeclara na ASF free

Limang mga municipalidades sa Camarines Sur an posibleng ideclara na kan Department of Agriculture (DA) asin National Meat Inspector Service (NMIS) bilang African Swine Fever (ASF) free ngonian na bulan alagad sarong banwaan an may pinakahuring caso kan virus sa hayop.

Si Emily Bordado, regional information officer kan DA Bicol nagpahayag na pigkukumpleto na an validations kan duwang ahencia nganing opisyal nang ideclara na ASF free an mga municipalidad kan Bombon na iyo an pinaka-enot na banwaan sa CamSur na nagkaigwang caso; Calabanga, Magarao, Lagonoy asin Goa.

Mantang pig-aandaman na an pagdeclara nin ASF free kan limang municipalides alagad bigla man na nagbutwa an bagong caso sa virus sa hayop sa Bula.

An pagkalat kan virus sa ataman na orig nangyari antes kan magbutwa an mga caso sa coronavirus disease (Covid 19) sa Bicol.

Alagad sinabi pa ni Bordado padagos man giraray an saindang mga ginigibong pag-monitor kan mga piggeries sa anom na provincias sa rehiyon dawa nagkukulpa na sa ibang mga banwaan nganing makontrol tolos an pag-ulakit naman kaini sa ibang mga lugar.

An pagbutwa kan ASF sa Bicol dakulang epekto sa mga negosyante sagcod sa nag-implementar nin mga lockdown kan slaughter house an mga lokal na gobierno asin kabale sa nalugi iyo an mga hog growers.

Maabot sa 12,437 na mga ataman na hayop an pig-depopulate o ginaradan sa Camarines Sur mientras na abut sa Php44 milyon an tinaong ayuda sa 1,684 apektadong paraoma.

An DA nagkaigwa man nin animal dispersal o pagtaong 20 atamanon na manok sa mga apektadong paraoma kan ASF. (dpa)