Pandemya tatagamahan nin fondo sa 2021 annual budget

Tatagamahan nin fondo kan lokal na gobierno kan Ciudad nin Naga an coronavirus disease (Covid 19) sa papandayon na 2021 annual budget nganing kaipuhan firming preparado an alokasyon sa ano man incidente arog kan pandemya.

Alagad si nangyari ngonian saindang pig-usar an fondo sa calamidad asin dapat isuhay an alokasyon sa pandemya.

Ini an mga pahayag ni Alcalde Nelson Legacion sa saiyang press conference kan Lunes, Agosto 17 na ginibo sa PSO Training Center sa City Hall sa tahaw kan padagos pang paglangkaw kan caso sa Covid 19 sa ciudad maging sa Kabikolan mantang sagcod sa ngonian nag-eenbento pa sana nin bakuna contra sa ‘‘deadly virus’’.

Maging an barangay tinikapo sa fondo sa calamidad sagcod na napiritan na maghagad nin ayuda sa City Hall.

Pig-aandaman na kan City Hall an executive budget alagad dai pa pigbuyagyag sa miembros kan media kun pera an alokasyon para sa Covid 19.

Apektado kan pandemya an economia mala ngani paralisado an operasyon kan Bicol Center Station na nakakasakdo nin milyones peso na ingreso an City Hall cada bulan, pagsara kan nagkaperang mga negosyo sa Naga City People’s Mall na nagresulta sa hababang koleksyon nin buwis maging an mga pribadong establisimiento de negosyo.

An resulta nagkaigwa an City Hall nin maabot sa Php264 milyon na shortfall sa 2020 annual budget, sabi pa kan jefe ejecutivo.

An saindang annual budget nurong taon 2021 tatapyasan hali sa dating Php1.4 bilyon posibleng gibohon nalang Php1.2 bilyon.

Si Consejal Salvador del Castillo,Vice Chairman kan Appropriation Committee sa Sangguniang Panlungsod nagsabi na dawa milyones peso an shortfall kan ciudad alagad magpapadagos an City Hall na ‘‘billionaire city’’ alagad saiyang kinumfirmar na mahuros an 2021 annual budget.

An causa iyo an hababang koleksyon nin buwis.

An Naga nakabali sa mga billionaire’s club sa huring tolong taon kan liderato ni dating Alcalde John Bongat. (DPAureus)