Sinuspending RD balik sa trabajo sa DPWH Bicol

Matapos makumple an anom na bulan na suspension kan Ombudsman sa dating assistant regional director kan Department of Public Works and Highways (DPWH) sa Region 8, Palo, Leyte asin na promote sa puestong director rehiyonal kan madestino sa Bicol kan Agosto 2018, tinukahan ni Sekretaryo Mark A. Villar na ibuelta sa dating posisyon sa rehiyon cinco puon kan Agosto 13, 2020.

Base sa special order hale sa opisina central kan DPWH na pirmado ni Sekretaryo Villar si Engr. Virgilio Eduarte ibinabalik sa kaparejong posisyon digdi sa DPWH Bicol karibay ni director Melvin Navarro na pigdestino sa ibang rehiyon na dai naman pigdetalye sa special order.

Si Eduarte nakatalaan mag-courtesy call ki Gobernador Bichara kan Albay asin Presidential Adviser for Bicol Affairs Marvel Clavecilla.

Magigirumduman an suspension order pirmado ni Ombudsman Samuel Martires alagad naging controvercial nin huli ta inabut nin onseng bulan antes na-implementar kan ahencia. An orden pinaluwas kan Ombudsman kan Febrero 1, 2019.

Si Villar nag-isyu kan Special Order 09 kan Enero 31 serye kan 2020 nag-iimplementar kan suspension order contra ki Engr. Virgilio Eduarte, director rehiyonal kan DPWH Bicol.

An suspension sa saiya huli sa graft complaint na sinangat saiya asin apat pang opisyales kan ahencia kan 2016 kan siya iyo pa an assistant regional directotr asin chairman kan Bids and Awards Committee (BAC) sa rehiyon 8, Palo, Leyte.

An B.M. Marketing iyo an nagsangat kan graft charges contra ki Eduarte asin apat pang iba na docketed OMV-V-A-18-0555 for grave misconduct, serious dishonesty and conduct prejudicial to the interest of the service.

An apat pang iba na nasuspendi sinda; Legal officer Eulogio Laboga; Quality Assurance and Hydrology Division chief Brenilda Mendoza; Equipment Management Division chief Romy Gumban; asin Tide Embankment chief Serafin Lago. Gabos sinda nasuspendi nin anom na bulan kan Deputy Ombudsman for Visayas Paul Elmer Clemente.

Matapos serbihan an preventive suspension sinda buelta na sa trabajo.

Kan Agosto 2018, pigtukahan kan DPWH si Eduarte bilang direktor rehiyonal sa Bicol.

An saiyang pigribayan kan Agosto 13, 2020 si Engr. Navarro iyo an nagribay man ki Eduarte, si Navarro dating direktor kan taon 2013. Kan 2015, siya nadestino bilang RD sa National Capital Region, asin sa opisina ni Villar.

An magiging ka-tandem ni Eduarte bilang assistant regional director iyo si Engr. Gerald Pacanan, dating district engineer kan DPWH Leyte 2nd District Engineering Office na may base sa Tacloban City, na dai palang nahahaloy pigdesignar ni Villar alagad office-in-charge an saiyang capacidad sa sinambit na puesto. (dpa)