EPEKTO KAN COVID-19: P19-M nalugi sa BCS ganansiya pa P190-k

Magpapadagos an operasyon kan Bicol Central Station (BCS) sa Ciudad nin Naga dawa nagsakat na sa P19 milyon an nawawarang ingreso huli kan pandemya alagad igwa pang ganansiya nin P190,713.18.


An solusyon digdi iyo an pag-implementar nin mga estratihiya na dai pa kaipuhan an subsidiya kan lokal na gobierno sagcod na mantenido an personajes nganing dai sinda mawaran nin trabajo sa tahaw kan inaatubang na krisis sa coronavirus disease (Covid 19) pandemic.

BICOL CENTRAL STATION

An hababaon na ingreso kan bus terminal nin huli ta puon kan Marso 15 hasta ngonian na Agosto asin ini epekto kan krisis sa Covid 19 dai pa tinutugotan kan Inter-Agency Task Force (IATF) asin kan Department of Transportation an viaje kan Bicol-Manila vice versa envez an nagdadalagan sana iyo an intra-province sa laog sana kan mga banwaan sa premir hasta sa ika-limang distrito kan Camarines Sur asin an inter-province an ruta sana iyo an Naga City – Tabaco asin Legazpi City mantang habo pang magpalaog nin PUV an gobierno provincial kan Camarines Norte.

Ini an mga pahayag sa Bicol Mail ni Roderick “Nonoy’’ Reforsado, manager kan BCS mala ngani sa saindang computation nagsasakat pa sa 101.28 por ciento an saindang ingreso base sa saiyang financial statement.

Sa operasyon kan BCS puon kan Enero 1 hasta Agosto 20 nagkaigwa pa sindang P15,050,650.38 na ingreso alagad kun babawason digdi an saindang expenses na nag-aabot sa P14,859,936.00 nagkakaigwa pa sindang ingreso nin total na P190,713.18, sabi pa ni Reforsado.

Kun mayong pandemya puon Enero 1 hasta Deciembre 31 nagsasakat sa P50-M an ingreso.

Alagad kun ikukumpara sa kaparejong peryodo kan 2019 igwa sindang P34 milyon na ingreso asin nalugi nin P19 milyon.

Dinagdag pa ni Reforsado kun magpapadagos an pandemya asin paralisado an viajeng Bicol-Manila magkakaigwa sindang negative income na dos hasta tres milyon pesos.

Sa mga negosyante na nag-aarkila nin puesto sa laog kan BCS, 46 sana an nagpapadagos alagad 54 an sarado. (dpa)