Linaw Program, tarabangan sa kalinigan kan salog Naga

An Salvar Salog na dating pigpunan kan mga nakaaging administrasyon kan City Hall nganing maprotehiran an kalinigan kan Naga river, mas pinapusog ngonian sa paagi kan Naga Linaw Program alagad dai susulohon kan ciudad envez katuwang an iba pang ahencias de gobierno.

Pigtugdas an programa sa paagi kan executive order ni Alcalde Nelson Legacion sagcod nagkaigwa nin pirirmahan na memorandum of agreement an ciudad sa pangenot ni Alcalde Legacion, Engr. Alexander Caning pamayo kan City Environment and Natural Resources Office, PENRO Grace Carino kan Department of Environment and Natural Resources kan Camarines Sur asin Lilian Ordino, PEMU CamSur Officer asin suportado kan maabot sa 22 na mga industry partners an nagpahayag kan saindang interes sa pag-implementar kan programa.

LINAW PROGRAM. Hali sa wala pasiring sa too sinda, ENRO Officer Engr. Alexander Caning, Alcalde Nelson Legacion, PENRO Grace Cariño kan DENR Camarines Sur asin Lilian Ordeno EMB officer kan CSur nag-aatubang sa press conference matapos kan ginibong pirirmahan sa memorandum of agreement nganing pangatamanan asin protehiran an Naga river. (dpa)

Sa press conference, sinabi kan jefe ejecutivo na an programa sa kalinigan kan salog maninigo man giraray an kooperasyon kan lambang namamanuan lalo na si mga nag-eestar sa gilid kan salog asin dapat ipasunod an water treatment plant kan mga industriya nganing malinig na an pigdadalihigan asin iluluwas na water waste o mga tubig hali sa mga industriya paluwas sa Naga river.

An Naga Linaw program o Naga Local Industries Network on Adopt-a-Waterways Program tinawan buhay sa paagi kan executive order 2020-024 na pigpirmahan kan Hunyo 19, 2020.

Kabali sa kasundoan kan envueltong ahencia asin kan City Hall na an mga industriya kinakaipuhan igwang tamang lugar na aatoman na maging regular an saindang gigobohon na clean up.

Sa kasundoan sinda magkakaigwa nin obligasyon sa programa bako sana sa ginibong pigpirmahan sa memorandum of agreement.

Si ENRO Officer Caning nagpahayag man na antes pa kan kasundoan sa memorandum of agreement an saiyang opisina regular na an ginigibong clean up drive sa Naga river.

Sakop kan programa an gabos na sapa. creek, asin iba pang mga dahiligan nin waste asin tubig uran sa laog kan jurisdiksyon kan ciudad.

Kun malinig an mga waterways dakulang bagay na malikayan an pagbaha nin huli ta dai matitipon an tubig sa sarong lugar. (DPAureus)