Voters registration liwat ipapadagos sa Septiembre 1

Pigtalaan na kan Commission on Election (Comelec) an pagpadagos kan voters registration puon sa Septiembre 1, alagad estrictong iimplementar an ‘‘health and safety protocols’’.

Si Abogado Maico Julia, Jr. Election Officer kan Ciudad nin Naga asin opisyal na parataram kan Comelec Camarines Sur nagsabi na sainda nang narecibe an Commission Resolution No.10674 na pinaluwas kan Agosto 12, 2020 nganing ipadagos an voters registration sa nasyon, afuera kan si yaon pa sa irarum kan enhanced community quarantine o modified ECQ.

Kan Marso 2020, iginilid muna an continuing registration kan commission huli kan pagdeclara nin ECQ ni Presidente Rodrigo Duterte epekto kan pagbungkaras kan corona virus disease sa nasyon.

Alagad nganing amay pag-andaman kan Comelec an masunod na pirilian sa 2022 liwat nagpaluwas nin resolusyon na nagsusugo sa mga election officer ipadagos an voters registration.

Magkakaigwa nin pagbabago sa aldaw kan pagpalista na mapuon alas 8:00 nin aga hasta alas 3:00 nin hapon alagad mapuon Martes hasta Sabado kabali na an holidays, sabi pa ni Julia.

Pigrecomendar kan commission na mag-download na muna nin forma an mga mapalista asin dapat ‘‘fill out’’ na ini antes darahon sa Comelec nganing irehistro bilang votante sa maabot na mga eleksyon.

Kabali pa sa pigmamando an registrants dapat mag-fill out kan Coronavirus disease self declaration form nganing maaraman kun igwang travel history asin iba.

An ibang sektor siring kan senior citizen, persons with disabilities asin bados na babae kaipuhan magbugtak nin express lane an lokal na opisina kan Comelec.

Pigsusugo man an mga opisina lokal kan Comelec na dapat magkaigwa nin regular na pagconducir nin araoaldaw na disinfection and decontamination sa opisina asin voters registration machine. (dpa)