STL mabubuhay kun may bendisyon si Pres Duterte
Naghahalat nalang kan bendisyon ni Presidente Rodrigo R. Duterte an Evenchance Gaming Corporation nganing magpadagos kan saindang operasyon kan Small Town Lottery (STL) sa Camarines Sur asin iba pang rehiyon.
Igwa nang rekomendasyon an Inter-Agency Task Force (IATF) asin Philippine Charity Sweeptakes Office (PCSO) sa declarado nang modified ECQ alagad kaipuhan man giraray an pag-aprobar kaini kan Malacañan.
Si Jobet Ramos, Provincial Manager kan PCSO sa Camarines Sur enot nang tinugotan ni Duterte an pabuelta kan bola kan lotto matapos masuspende ini asin STL huli kan pandemya asin nagdeclara nin enhanced community quarantine an gobierno.
Digdi sa Camarines Sur labi sa dos mil an mga empleados siring kan kabo, rebisador asin kolektor an natatawan nin trabajo an padagos nang nalalangkag alagad napependiente pa an pagtugot kan Malcañan mantang padagos pa an paglangkaw kan caso sa coronavirus disease.
Ribo-ribo na an nabubuhay kan pagbuelta kan STL sa enterong nasyon nakakaulang sana iyo an pandemya.
Nag-aandam an Evenchance sa pagbuelta kan saindang operasyon sa Camarines Sur asin sa iba pang provincia sa Bicol alagad an operator naghahagad sa PCSO na bawasan muna an saindang pigbabayad na milyones peso na remittance mantang apektado man sinda kan pandemya.
Sinabi pa ni Ramos maging an pagbuelta kan mga lotto outlet apektado man kan pandemya mala ngani nagbaba nin maabot sa caurenta (40) por ciento an saindang koleksyon aroaldaw.
Dawa na hababa an koleksyon nagpapadagos paman an pagtaong ayuda kan PCSO sa hospital asin sa mga pasyente na may kidney disease, sabi pa ni Ramos.
Pigmamando na kan IATF oras na magbuelta na an operasyon kan STL, babawalan na maging empleado o kolektor an mga senior citizen asin gabos sinda dapat magkua muna nin medical certificate asin magsunod sa health protocol.
An STL sa Camarines Sur nakabuelta kan Marso 1, 2020 mantang an daily draw asin remittance kan taya pigkukunducir sa Magsaysay Avenue, Ciudad nin Naga.
Alagad dai ngani nagsarong bulan an operasyon napundo sa tahaw kan padagos na pagbungkaras kan Covid 19. (dpa)