9th ID nagpahimotik sa sahot kan mga activista

An 9th Infantry Division kan Philippine Army sa Bicol namay base sa Camp Elias Angeles, San Jose, Pili, Camarines Sur nagpahimotikan sa akusasyon na saindang pigre-red tagging komo terorista an mga lider kan progresibong grupo sa CamSur asin iba pang provincia kan rehiyon cinco.

Mayo kaming evidencia na sinda terorista, si Joma Sison, kagpundar kan Community Party of the Philipppines (CPP) iyo an nagsasabi na an mga progresibong grupo ‘‘associated’’ sainda.

Dai kami na nagtatag sa sainda bilang terorista mayong nagsabi kaiyan samuya alagad nagtutubod an militar na iyan an pagtubod kan progresibong grupo nganing makua nin simpatiya kan tawo.

Ini an mga pahayag sa Bicol Mail ni Army Capt. John Paul Belleza, opisyal na parataram kan 9th ID kasunod kan mga akusasyon asin pagkundenar sa militar ninda Bagong Alyansa Makabayan (BAYAN) chairperson Nelsy Rodriguez asin Joel Pillogo kan Condor-Piston parejo kan Camarines Sur.

Enot nang sinabi ninda Rodriguez asin Pillogo, sa ginibong orientation seminar kan 9th ID sa mga residentes kan barangay San Isidro, Ciudad nin Iriga kan nakaaging Agosto 23, 2020 pinapaheling an saindang mga retrato asin iba pang mga lider kan progresibong grupo asin pinapaliwanag na kabali na sinda sa grupo komo terorista.

Alagad sinabi ni Belleza an ginigibo kan saindang mga soldados sa barangay iyo an pagpaliwanag kan community support program parte kan saindang esfuersos nganing matabang an residentes kan barangay kan mahalagang isyu kabali na an pagpaliwanag kan presenting situasyon sa insurhencia o an mapadapit sa CPP/NPA.

Pigtatao pa nindang ladawan hali mismo sa CPP founder kan naheling ninda sa documentary firm na si Sison nagsasabi na an grupong ini particulatmente an progresibong grupo nasa umbrella organization kan CPP/NPA.

Saiya pang sinabi na dai sinda nagre-red tagging kundi si mga pinapaheling duman si lider na associated sa kumunista na hali man sana sa mga pahayag ni Joma Sison.

‘‘Pinapaheling ta ini si grupo na pigkokonektar ni Sison sa kumunista, mayo kaming evidencia na sinda terorista asin NPA’’, sabi pa kan 9th ID.