GMRC iimplementar kan DepEd kun igwa nang IRR

Preparado na iimplementar giraray kan Department of Education (DepEd) an pagbuelta kan subject na Good Manners and Right Conduct (GMRC), alagad kaipuhan magpanday muna an ahencia kan implementing rules and regulations (IRR) nganing punan sa burokasan nin klase sa Oktubre 5 ngonian na school year 2020-2021.

Si Mariano ‘Manny’ De Guzman, OIC School Division Superintendent kan DepEd sa Ciudad nin Naga nagpahayag sa entrevista kan Bicol Mail dai man nin kaulangan sainda an pagbuelta kan GMRC mantang naribayan sana ini kan Edukasyon sa Pagpapakatao curriculum.

Makakatabang an liwat na pag-implementar kaini nganing mas mapapapusog an values education subject sa mga estudiantes na puedeng itukdo alagad dai ninda maaraman kun iimplementar na ngonian na taon mantang dai pang IRR.

Dawa suspendido an face-to-face learning huli kan pandemya, sa paagi kan saindang modular instructions puedeng tawan nin leksyon sa paagi nin pagbasa maging online classes kan magiging marhay na pang-uugali kan mga estudiante.

An pagbuelta kan GMRC inaprubaran ni Presidente Rodrigo Roa Duterte na saro nang Acta Republica 11476 bilang inaapod na GMRC and Values Education Act of 2020.

An ley saro nang comprehensibo asin kun igwa nang IRR piglalaoman na kabali na sa programa kan K-12 curriculum kan DepEd.

An GMRC itutukdo aroaldaw sa kindergarten level asin magiging separadong na subject sa elementarya.

Sa grade 7 hasta 10 itutukdo bilang values education subject asin isasaro sa GMRC. Para sa grade 11 asin 12, values education sasaroon man sa gabos na subjects sa irarum kan K-12 Basic Education Curriculum.

An dating GMRC, hinali kan ahencia bilang subject sa lindong kan K-12 program kan 2013. (DPAureus)