Catan, permanente nang CD kan NCPO

Nagtutukaw nang permanteng City Director kan Naga City Police Office (NCPO) si Police Col. Marlon Catan alagad naghahalat nalang kan pormal na kumfirmasyon kan Bicol PNP na pigdedesignar na komo ‘full-fledged’ CD epektibo ngonian na Septiembre 2020.

Napapanahon an numbramiento sa saiya nganing makafuncionar nin buelo sa posisyon na dai na kaipuhan mag-agi sa Camp Semion Ola, Ciudad nin Legazpi an ano man na direktiba sa kapupulisan kan NCPO mantang nag-aandam an ciudad sa Festividad ni Ina dawa na cancelado an gabos na actividades kan simbahan asin City Hall.

Si Catan nagtukaw sa NCPO bilang OIC City Director kan Hunyo 2020 alagad nakatabang nganing mapermanente sa posisyon kasunod kan pinasar na resolucion kan Sangguniang Panlungsod na padreno si Consejal Joselito Del Rosario na pig-eendorsar ki Brig. General Bartolome Bustamante, regional director kan Bicol PNP nganing tukahan komo full-fledged CD.

Sa entrevista kan Bicol Mail ki Consejal Del Rosario sinabi kaini an numbramiento hinahagad kan City Hall tanganing magkaigwa nin estabilidad an liderato kan NCPO sa panahon kan pandemya lalo na ngonian na Festividad ni Ina.

Sa sarong programa sa NCPO, si Alcalde Nelson Legacion iyo an nag-anuncio kan kumfirmasyon na si Catan designado na bilang permanteng CD.

Si Consejal Antonio ‘Dodith’ Beltran, nagrerepresentar kan Liga nang Barangay kan ciudad nagpahayag na naheling ninda an marhay na ‘performance’ kan OIC CD nganing saindang paboran na maninigo nang ginohon si komo permanteng pamayo kan NCPO.

Sa perang bulan na liderato kan bagong jefe Naga PNP nadagdagan nin bagong 78 miembros kan pulisya nganing makatabang sa pagmantenir nin paz y orden sa ciudad asin pigwarak na sa apat na Police Station.

Afuera pa kaini, nakahagad siya sa Camp Semion Ola nin 150 miembros kan augmentation force na dugang na fuersa sa mga border control asin sa iba pang estratihikong lugar ngonian na panahon kan Festividad ni Ina. (dpa)