Panghihipa sa mediaman kinundenar kan KBP CamSur

Kinukundenar kan KBP Camarines Sur an ika-duwang binadil gadan na miembros kan media sa Ciudad nin Sorsogon asin hagad ninda an makaskas na imbestigasyon kan PNP nganing masangatan nin caso an mga responsable asin posibleng nasa likod kan krimen.

Ini an mga pahayag ni Joel ‘Bong’ Echaloce, pamayo kan KBP Camarines Sur mantang sunod sunod na an insidente matapos enot nang likidaron kan Agosto 13, 2020 an sarong DJ sa sarong FM station sa Sorsogon na padagos naghahagad nin justicia an familia asin pag-iriba sa KBP.

Sa inbestigasyon kan City Police Station sa Ciudad nin Sorsogon an biktima pigbistong si Jubert ‘‘Polpog’’ Bercasio, sarong online media practitioner mantang nagpapadalagan kan saiyang motorsiklo mga alas 7:50 Lunes na banggui, Septiembre 14 hali sa centro kan ciudad pasiring sa barangay Kabig-an alagad kan makaabot na sa may crossing, an suspechado na motorcycle riding-in-tandem biglang pinaputokan nin badil nin apat na veces na tuminama sa manlaen-laen na parte kan hawak kan biktima na tolos binawian nin buhay.

An nakaangkas sa motorsiklo iyo an nagbabadil sa biktima mga duwang lakad sana an distansya.

An PNP nagsayuma pang magtao nin detalye kun siisay an posibleng mga responsable sa krimen mantang nagpapadagos an saindang imbestigasyon.

Sa Camp Semion Ola kan Bicol PNP, si regional director Brig. General Bartolome Bustamanten tolos nagbilog nin Special Task Force Bercasio nganing iyo an magtutok sa inbestigasyon.

An biktima igwang programa na may titulong ‘Balangibog’ sa Internet TV sa Ciudad nin Sorsogon.

Alagad sinabi ni Echaloce an Internet TV gamit an face book dai man regulated kan National Telecommunication (NTC) asin dai man acreditado kan national KBP asin an problema kun mayong KBP ID an biktima dai kabali sa puedeng maka-claim sa KBP insurance alagad an saindang organisasyon mahimo nganing matabangan.

Kun igwang KBP ID sa dating estasyon nin radyo na pighalian kaini, aadalan ini kan national KBP kun puedeng iconsiderar na maka-claim sa insurance.

Si Bercasio, nagcandidatong bise alcalde kan nakaaging eleksyon lokal alagad nadaog. Nagbugtak kan saiyang programa sa sadiri kaining face book. (dpa)


Si City Director P/Col. Marlon Catan (sa wala), preparado na sa pagmantenir kan paz y orden sa panahon kan Peñafrancia fiesta matapos idesignar na kan Bicol PNP bilang full-fledged City Director kan NCPO. (R. Baylon-CEPPIO)