CAUSA KAN PAGLAKOP KAN ASF: Modus operandi kan mga hog growers, pigbuyagyag

An Bureau of Animal Industry (BAI) nag-iimbestigar na kan modus operandi kan nagkaperang apektadong paraoma o mga nag-aataman nin orig sa Rinconada area na nagiging dahilan sa paglakop kan african swine fever (ASF) sa pagtaraig na barangay asin banwaan.

Pigbuyagyag ni Emily Bordado, opisyal na parataram kan DA Bicol na madaling naglalakop an ASF sa mga atamang na origan sa Rinconada area nin huli kan igwa man sanang residentes sa barangay iyo an kasabuwat kan viajero nganing bakalon an orig kan mga paraoma dawa igwa nang helang o positivo sa ASF.

Nagtitipon nang evidencia an BAI nganing madakop asin cancelaron na an permit kan mga hog growers na envuelto sa modus operandi.

Sinabi pa an nagkaperang hog growers sa Bula asin Nabua, sakop kan Rinconada area sa Camarines Sur nagiging kasabuwat kan mga ahente iyo viajero na hali pa sa ibang rehiyon nganing bakalon an saindang orig sa baratong presyo dawa infected na kan ASF.

Kabali sa modus operandi an viajero nagaraje kan saindang truck sa Bato, CamSur na negativo pa sa virus sa hayop sagcod pasaging makua nin permit sa pagtransportar kan hayop.

An kawarang cooperasyon kan mga residentes asin ibang paraataman nin hayop iyo an nagiging causa kan paglangkaw kan caso kan ASF sa Bula asin sa Nabua.

Hagad kan DA Bicol an cooperasyon kan publico nganing isombong sa mga awtoridad an padagos pang envuelto sa modus operandi asin si mga barangay na infected kan virus dapat i-depopulate na an saindang hayop nganing dai na mag-ulakit.

Igwa naman bagong caso sa ASF sa duwang barangay sa Baao asin sarong caso sa Ciudad nin Iriga.

Enot nang nagbungkaras an virus sa hayop sa mga banwaan kan Minalabac, Pili, Nabu asin Bula.

Dawa na ngani nadagdagan an mga banwaan na may caso sa ASF, alagad igwa nang mga banwaan an posibleng ideclara nang ASF free asin ini kinababalihan kan Bombon, Calabanga, Magarao, Lagonoy asin Goa, sabi pa ni Bordado.

Alagad kaipuhan kumpletohon muna kan mga barangay asin LGU an mga rekisitos asin dapat mantenido na negativo na sa ASF.

An DA nakatalaan man magtao nin atamanon na libreng piglets sa mga na-apektaran na mga paroma kan ASF. (dpa)