NFA suficiente sa fondo sa palay procurement-DA
Pili, Camarines Sur. Igwang awad-awad na fondo an National Food Authority (NFA) hali sa Departamento de Agricultura (DA) tanganing gamiton na pagtungod nin paroy kan mga paraoma mientras na halangkaw an presyo cada kilo kumpara sa bagsak presyo kan mga pribadong kumprador.
Nag-apelo an DA Bicol sa mga paraoma nganing mas halangkaw an presyo kan saindang paroy dapat ipabakal sa pinakaharaning bodega kan NFA sa saindang banwaan.
Si Emily Bordado, regional information officer kan DA nagsabi na nagpabulos nin dakulang fondo an saindang ahencia sa NFA nganing ciertong igwang fondo ano man na oras na nabagsak an sinakong paroy hali sa mga paraoma, alagad dai man sinabi an cantidad para sa palay procurement program.
Afuera pa kaini, segun sa DA nagtao sinda nin tabang finansyal sa mga farmer cooperative nganing gamiton sa pangbakal nin paroy kan paraoma na dapat mas halangkaw an presyo sa pribadong kumprada.
Agrangay ngonian an mga paraoma nin huli ta nagbagsak an presyo kan paroy na dating nagcacantidad nin P16.00 alagad sa ngonian P12.00 na sana cada kilo.
Kun ibabagsak kan mga paraoma an saindang inalang nang paroy sa NFA an presyo cantidad nang P19.00. Kadakli kan mga paraoma nagpapa-ani nin paroy alagad sinasabayan man nin hababang presyo kan mga kumprador.
Nakadagdag pa digdi iyo an ribo-ribong toneladang imported rice hali sa nasyon kan Vietnam asin Thailand an naglalaog sa mga mercado epekto kan controvercial na rice tariffication law (RTL) kan administrasyon Duterte.
An mga rice traders nakakabuelo sa pag-angkat nin suplay nin bagas hali sa ibang nasyon nin huli kan RTL. Sa entrevista man ki Silvestre Bonto pamayo kan National Confederation of Irrigators Association, sinabi kaini na mayo na sa pagbasol ninda sa RTL envez nagkakaigwang rice cartel an mga buayang negosyante. Hinahagad kaini sa paraoma na darahon nalang an saindang paroy sa NFA na mas halangkaw an presyo. An Camarines Sur na iyo an tambubong nin paroy sa Bicol iyo an mayor na apektado kan rice cartel. (dpa)