PARA SA PROYEKTO SA COVID-19: Php30-M hinahagad kan City Hall sa DBM

Naghahagad na nin fondo an lokal na gobierno kan Ciudad nin Naga sa Department of Budget and Management (DBM) nganing maayudahan an ciudad para sa nakalinyadang proyekto sa coronavirus disease (Covid 19).

Sa sesyon regular kan Sangguniang Panlungsod (SP) kan Martes, Septiembre 22 pinangenotan ni Consejal Joselito del Rosario an joint and collective motion na naghahagad nin P30 milyones na fondo sa DBM tanganing gamiton para sa pambakal nin personal protective equipment (PPEs), pagpakarhay kan mga quarantine facility, bulong, bitamina maging pagkakakan kan mga tawo na nagpapa-cuarintina.

An resolusyon inaprubaran kan SP kasunod man kan surat sa sainda ni Alcalde Nelson Legacion na kaipuhan na an tabang finansyal kan gobierno nasyonal sa programa sa Covid-19.

Dakula nang cantidad an nabawas sa calamity fund kan City Hall na ginamit puon na magbungkaras an virus kan Marso hasta sa ngonian, sabi pa ni del Rosario.

Maninigo na ipaseguro kan ciudad an natatada pang fondo sa calamidad mantang an masunod na mga bulan nin Oktubre, Noviembre asin Deciembre dai nahahalian kan paglaog nin bagyo.

Nagtutubod an consejal na dai hihilingon kan DBM an kolor politica huli sa pandemya mantang dawa yaon sa administrasyon asin oposisyon gabos apektado.

An mga elihidong opisyales lokal na pinamamayohan ni Alcalde Legacion anas miembros kan Liberal Party (LP), kaalyado sa politica ni Bise Presidente Leni Robredo na midmid na kritico kan administrasyon. (dpa)