STL na jueteng sa Albay nagprubar arogon kan CSur
Nagpuprobar an operador nin jueteng sa Camarines Sur nganing arogon an ilegal na online small town lottery sa Albay mala ngani nagpaapod pa nin miting sa mga correador sa segundo distrito kan CamSur alagad kulang an mga nagtunga asin envez dai sinda nag-uuyon sa ilegal na sugal nganing dai makasohan.
An bola kan illegal online STL sa Albay iyo nagiging prontera na palusot sana na STL alagad operasyon kan jueteng na dai napapapundo kan mga awtoridad.
Si Provincial Manager Jobet Ramos kan Philippine Charity Sweeptakes Office (PCSO) sa Camarines Sur nagsabi sa Bicol Mail na nagdadanay an ilegal na operasyon kan STL sa Albay asin iyo si planong i-adaptar kan jueteng operator sa CamSur na dai man aram an pangaran.
An operasyon kan jueteng sa Albay iyo an nag-gadan kan operasyon kan STL kaya mayo nang naglalaog na operator kan legal na sugal na may franquicia sa PCSO.
Pigbuyagyag pa kan mga correador sa CamSur na nagsayuma nang magtao kan saindang pangaran na saindang hinahalat an pagbuelta kan operasyon kan Evenchance Gaming Corporation mantang ini legal asin mayo pang peligro na sinda dakupon asin casohan sa jusgado.
Kinumfirmar pa sa BM ni Ramos na sa masunod na bulan nin Oktubre mabalik na an operasyon kan STL sa Camarines Sur matapos aprobaran kan PCSO an hagad kan Evenchance na treinta por cientong discuento sa pigbabayad na minimum guaranty amount na dating P20 milyon cada bulan alagad nainaan nin 30 por ciento. An dahilan nin huli ta kulang pa an mga nagtataya sa tahaw kan padagos pa an pandemya.
An STL sa Camarines Sur napundo kan Marso 2020 nin huli kan pandemya alagad igwa nang pagtugot an national Inter-Agency Task Force asin PCSO, sabi pa.
Nag-aviso man an PCSO sa operador kan STL na ibabawal na an mga senior citizen na correador asin an mga kolector dapat magsunod sa mga health protocol kabali na an pagsulot nin face mask asin face shield.
Labi sa dos mil an saindang kolektor, ribisador, kabo asin iba pang empleados kan Evenchance na nakinabangan kaya piglalangkag na an saindang dating correador.
Kun balik na an operasyon an regular na bola liwat gigibohon giraray sa Magsaysay Avenue, Ciudad nin Naga na pigcocontra kan City Hall. (DPAureus)