NFA CamSur binabaha nin paroy


Palay harvester - modernong makina nganing makaskas an pag-ani sa mahiwas na paroyan sa brgy. Pacol, Ciudad nin Naga alagad nagrereclamo an mga paraoma sa bagsak presyo kan saindang paroy binabakal na sana nin P11.00 hasta P12.00 cada kilo. (DPA)



Pili, Camarines Sur – Binabaha an mga bodega kan National Food Authority (NFA) sa Camarines Sur sa tahaw kan panahon nin aranihan puon ngonian na bulan nin Septiembre mala ngani kulang pa an presenting pitong Buying Station mabukas naman sa brgy. Talibtib, Canaman, CamSur.

Sa saindang average aroaldaw sa palay procurement sa bodega kan NFA sa Palestina, Pili, CSur nakaka-bakal sinda nin 5,600 na sako hali sa lihitimong mga paraoma.

Kun aldaw nin Lunes nin huli ta sarado an saindang opisina sa aldaw nin Sabado asin Domingo, inaabot nin diez mil na sako an saindang nababakal.

Si Assistant Provincial Manager Nora Follusco nagpahayag sa Bicol Mail na puon kan Septiembre 1 hasta kasuodmang Septiembre 30 maabot na sa sangatos mil na sakong paroy an saindang binakal asin target ninda na makabakal nin 540,000 na sakong paroy hasta sa Deciembre 2020.

Sa ngonian igwa pa sindang stock nin 65,000 na sakong bagas asin maabot sa 190,000 na sakong paroy gabos mga locally produced asin mayo nang imported rice mantang bawal na sinda mag-angkat nin bagas asin yaon na sa pribadong rice traders huli kan rice tariffication law.

Sa pinaluwas na datus kan Department of Agriculture sa Bicol an Camarines Sur na tambubong nin paroy sa rehiyon cinco an production estimate maabot sa 2.6 milyon na sakong paroy an puedeng anihon.

Sa ngonian igwa sindang mga buying station sa mga banwaan kan Libmanan, Cabusao, Tigaon, Ciudad nin Iriga, asin Palestina, Pili alagad mabukas naman sa brgy. Talibtib, Canaman.

Inaalok kan NFA Camarines Sur an mga paraoma na sainda na magpabakal nin paroy nin huli ta an presyo kan alang na paroy ninda cantidad P19.00 kumpara sa P12.00 sa pribadong kumprador.

Sinabi pa ni Follusco na suficiente an saindang palay procurement fund mala ngani igwa naman sindang nag-abot na P23 milyon nganing makabakal naman nin 24,000 na sakong paroy. (DPAureus)