SA BUROKASAN KLASE SA OKT. 5 70% maklase sa modular learning

Mayoria kan maabot sa cincuenta mil na enrollees sa Division of City Schools kan Department of Education (DepEd) sa Ciudad nin Naga, maklase sa modular learning sa burokasan nin klase sa Oktubre 5.


Si Manny De Guzman, School Superintendent kan DepEd Naga nagpahayag kasabay kan pagpalista kan mga estudiantes sa saindang escuelahan igwa nang survey form nganing saindang simbagan kun saen sinda maklase sa paagi kan modular, online asin iba pang blended learning.

Alagad sa resulta setenta por ciento sa mga estudiantes nagpapabor sa modular learning na magamit nin printed materials, veinte por ciento sa online classes asin diez por ciento sa iba pang blended learning.

Anom sa 28 mga escuelahan sa elementarya mantang tolo sa onseng escuelahan sa segundarya an mga online classes alagad gabos sindang mga escuelahan maimplementar kan modular learning deliveries, sabi pa ni De Guzman.

Mayoria an nagpabor sa modular learning nin huli ta saindang enterong mare-review an libro asin leksyon.

Alagad saiya pang sinabi na dawa online kairiba sinda sa modular na pigpagibohon nin printed materials ta kun magkaigwa nin problema igwang suporta an DepEd.

Sa saindang pag-andam an mga escuelahan na mabukas sa online classes igwa nang internet connectivity alagad sa suporta kan City Hall sa DepEd Naga ginibohan nin programa nganing mas makusog an signal sa connectivity.

Kabali sa pigtaong asistencia sa sainda kan LGU, si mga kulang sa connectivity pigdagdagan si ibang may connectivity nganing cada escuelahan dapat igwang dai mababa sa 100 MBPS (mega bytes per second) power kan saiyang connectivity.

Sa mga segundaryang escuelahan sa Ciudad nin Naga an Camarines Sur National High School (CSNHS) asin Naga City Science High School igwang lampas sa 500 MBPS alagad sinda an may halangkaw na numero nin estudiantes sa online classes.

An mga paratukdo na kulang sa kaaraman sa gadgets na matukdo sa online classes pigpa-seminar kan DepEd nganing mahasa sinda sa remote classes.

Sa Naga City Police Office (NCPO), sinabi ni City Director P/Col. Marlon Catan mawarak sinda nin kapupulisan sa mga escuelahan alagad kun ini kaipuhan mantang kulang man an estudiantes na mapasiring sa saindang escuelahan nin huli ta mayong face-to-face learning. (DPAureus)