SA CAMARINES SUR: STL buelta sa operasyon isasabat contra jueteng

Nagpupuon na an operasyon kan jueteng sa mga banwaan kan Rinconada area asin sa segundo distrito kan Camarines Sur alagad piglalaoman na luway-luway magagadan an ilegal na sugal oras na magsikad na an operasyon kan small town lottery (STL) ngonian na aldaw, Oktubre 1.

Igwa nang pagtugot an main office kan Philippine Charity Sweepktakes Office (PCSO) asin magiging centralisado an bola na gigibohon tolong veces cada aldaw sa Magsaysay Avenue, Ciudad nin Naga.

Ini an mga pahayag sa Bicol Mail ni PCSO Provincial Manager Jobet Ramos kasunod kan kumfirmasyon kan saindang main office na aprubado na an pagbuelta kan STL sa Camarines Sur sa paagi kan franquicia na pig-isyu sa Evenchance Gaming Corporation.

Sinabi ni Ramos ano man na online STL operation iyan ilegal asin ginagamit sanang prontera kan ilegal na sugal na jueteng.

Naka-abot na an sombong sa PCSO na igwa nang mga naglilibot na mga kolektor sa jueteng sa nagkaperang banwaan sa segundo distrito, sa Ciudad nin Iriga asin iba pang mga banwaan sa Rinconada area.

Sa treinta y cincong banwaan asin duwang ciudades sa Camarines Sur maabot man sa otso mil (8,000) an mga empleados kan Evenchane kabali digdi si mga correador, ribisador asin empleados sa collection center asin sinda naka-oniporming T-shirt na suplay kan operator.

Alagad antes kan saindang pagbuelta kan operasyon sa Oktubre 1, 2020 nagpirirmahan na kan Martes, Septiembre 29 an Evenchance asin PCSO sa pagseguro na masunod an operator sa gabos na minimum na health protocol na pig-iimponer kan national Inter-Agency Task Force.

Dai na tutugotan an mga senior citizen na maging kolektor mantang an mga correador dapat nakasulot nin oniporme kan STL, naka-face mask asin nagsusunod sa physical distancing.

An STL sa Camarines Sur dati nang nagpuon kan Marso 1, 2020 alagad sinuspende muna kan Marso 17 sa tahaw kan naglalangkaw na caso sa coronavirus disease (Covid 19). (DPA)