Tabang finansyal kan PCSO, tinatakad na

Nin huli kan pandemya nagaabot na sana sa P50 milyon hali sa dating P600 milyon cada bulan an kayang ipaluwas na fondo kan opisina provincial kan Philippine Charity Sweeptakes Office (PCSO) Camarines Sur nganing itabang sa mga nangangaipong pasyente na may cancer, kidney disease, asin iba pang may helang na kaipuhan an saindang ayuda.

Maging sa asistencia finansyal sa mga maluwas nang pasyente sa hospital sagcod na sana sa tres mil hasta diez mil pesos kun dati nakakatao pa sindang ayuda sagcod sa viente mil pesos.

An mayor na dahilan iyo an hababaon na koleksyon sa mga lotto outlet mantang pendiente pa an pagbuelta kan operasyon kan small town lottery (STL).

Ini an mga pahayag ni PCSO Provincial Manager Jobet Ramos kan maconducir nin entrevista kan Bicol Mail sa paagi nin telepono sa tahaw kan nag-aabot na sana nin cuarenta por ciento an koleksyon sa mga lotto outlet.

Perang bulan pang nagsara sa enterong nasyon an mga lotto outlet maging an STL mantang apektado kan pandemya.

Alagad dawa P50 milyon nalang an saindang naitataong tabang finansyal an mahalaga igwa pa sindang dikit na ayuda sa mga tios na pasyente, sabi pa ni Ramos.

Segun pa sa PCSO Camarines Sur ngonian na bulan piglalaoman na mabuelta na an operasyon kan Evenchance Gaming Corporation na iyo an nakakua kan franquicia sa STL digdi sa provincial.

Makaka-dugang ini sa ingreso kan ahencia alagad mabawas an saindang makukua sa minimum guaranty amount matapos aprubaran kan saindang opisina central na tawan nin treinte por cientong discuento mantang apektado pa an koleksyon nin huli kan pandemya.

An national Inter-Agency Task Force (IATF) asin PCSO nagtugot na puede nang ipadagos an operasyon kan STL.

An STL sa CamSur nagbuelta kan Marso alagad dai nahaloy pinapundo kan IATF kasunod kan padagos na paglangkaw kan caso sa coronavirus disease (Covid 19) sagcod na nagdeclara nin enhanced community quarantine si Presidente Rodrigo R. Duterte. (DPAureus)