Brownout bawal sa DepEd
Nauulang naman an Camarines Sur II Electric Cooperative (Casureco II) sa implementasyon kan paghubo kan mga poste na apektado kan road widening project kan Department of Public Works and Highways (DPWH) nin huli sa mga pakiulay kan Department of Education na igilid muna an mga brownout mantang nag-puon na an klase kan Oktubre 5.
Igwa nang mga nakawarak na mga electrical poles sa brgy. San Felipe, Ciudad nin Naga maging sa iba pang barangay asin lugar, alagad nakiulay an mga school principal sa sainda na kun puede ibitaran muna an pagtalaan kan brownout kun oras nin klase.
Ini an mga pahayag ni Rinner Bucay, opisyal na parataram kan Casureco II mantang nag-aandam na an 2nd Engineer District kan DPWH Camarines Sur para sa full implementation kan road widening project matapos radason nang purutolon an mga puon nin kahoy sa kalabaan kan Kalye Liboton asin brgy. San Felipe.
An saindang trabajo sa paghubo nin mga poste puon aldaw nin Lunes hasta Viernes, alagad kun matalaan nin brownout apektado an mga estudiantes.
Bulan pa nin Marso 2020 piglatad na an mga poste sa gilid kan tinampo alagad napundo an trabajo kan contratista nin huli kan pandemya, alagad ngonian tugot na kutang ipadagos an trabajo apektado naman sa mga pakiulay kan escuelas publica, sabi pa ni Bucay.
An DepEd nakiulay sa Casureco II asin National Grid Corporation of the Philippines (NGCP) na ibitaran muna an pagtalaan nin brownout nganing dai ma-apektaran an mga online classes asin iba pang blended learning kan mga estudiantes.
An nangyayari si mga pigtalaan na brownout kan NGCP sa North area kan cooperativa siring kan mga banwaan kan Calabanga, Tinambac-Siruma, Bombon, Magarao asin Canaman nagkapera nang veces pigtalaan kun aldaw nin Sabado asin Domingo.
Maduwang taon na an urulay sa paghubo kan Casureco II sagcod na nagkaigwa nin harampangan an OIC General Manager kan cooperativa asin opisyales kan DPWH sa Sangguniang Panlungsod kan Ciudad nin Naga alagad padagos na-aabala.
Dinagdag pa ni Bucay kabali pa sa problema kan cooperativa si ibang may sadiri nin propriedad na makakalaog an electrical poles habong magtugot.
Sa ngonian an ginigibo kan Casureco II iyo an implementasyon kan Acta Republica 1136 na midmid bilang ‘‘The Anti-Obstruction of Power Lines Act’’ na nag-aawtorisar sa mga cooperativa nin electricidad na purotulon an puon nin kahoy dawa mayong permiso sa Department of Environment and Natural Resources (DENR), na nakaka-ulang sa mga electrical poles asin kuryente na nagiging causa nin mga brownout sagcod nakaka-apektar sa mga poste kun naglalamasa an makusog na bagyo.
An implementing rules and regulations nagluwas sana kan Marso 2020, matapos aprubaran ni Presidente Rodrigo Duterte an ley kan Agosto 8, 2019. (DPAureus)