Estudiantes sa public schools nagbaba epekto kan Covid-19

Nagbaba an enrollees sa mga escuelas publica ngonian na 2020-2021 school year kumpara kan nagtalikod na taon epekto pa kan nagdadanay na pandemya asin pagtios kan mga magurang nin huli ta dakul an nawaran nin trabajo.

Dawa duwang veces nang pig-uktaba an burokasan nin klase kan Hunyo asin Agosto sagcod na igwa pang naghabol na nagpalista antes kan Oktubre 5 alagad dai na kinayang magsagad sa sangatos por ciento.

Si Director Guilbert Sadsad kan Departamento de Edukasyon (DepEd), Bicol nagpahayag na maabot sana sa 1.6 milyon o 96 por ciento an total na numero kan enrollees sa elementarya asin segundarya sa anom na provincia kan rehiyon.

Nagbaba nin labi sa 66 mil na estudiantes an dai na nakapalista ngonian na school year dawa na ngani duwang veces pinalawig an burokasan nin klase na nagpuon na kan Oktubre 5.

Dakulang bagay an pag-uktaba kan burokasan nin klase nganing madungangan an pagpalista na pinaagi na sa distance enrollment alagad dai pa nakasakat 100 por ciento.

Nin huli kan pagtios ngonian na panahon asin pandemya ini an mayor na dahilan na nagbaba an mga nagpalista dawa libre na an matricula sa escuelas publica, sabi pa ni Sadsad.

Sinabi pa kan direktor nasa 90 por ciento kan mga enrollees mas ginusto an modular learning, 10 por ciento sana sa online classes, alagad an modular printed igwang kumbinasyon na TV/radio instruction.

An DepEd Ciudad nin Naga namay cincuenta mil na enrollees asin 20 por ciento sa online classes mantang an City Hall igwang asistencia sa internet connectivity alagad setenta por ciento sa modular learning asin diez por ciento sa iba pang blended learning. An ibang mga ciudades sa Bicol nagtao man nin tabang sa mga public school para sa internet connectivity.

An ibang mga LGUs igwa man nin suporta sa mga escuelahan sa saindang mga kanya-kanyang banwaan siring kan mga suplay sa modular learning, travel allowance asin communication allowance. (DPAureus)


Dai na nasunod an social distancing sa pagkua nin mga module sa Brgy. Hall kan Concepcion Pequeña na gagamiton kan estudiantes sa modular learning kan Camarines Sur National High School asin kabali na digdi si mga magurang hali pa sa brgy. Del Rosario, Ciudad nin Naga. (N. Makawili)