Kick-off proj kan Kiwanis Club piglansar sa Brgy. Cararayan

An bagong opisyales kan Kiwanis Club of Metro Naga na nag-asumir palang sa posisyon saindang naheling na sa tahaw kan krisis sa pandemya pigtawan nin prioridad an pagtabang sa Missionaries of the Poor sa Barangay Cararayan, Ciudad nin Naga.

An programa kan Kiwanis Club bilang saindang ‘‘kick-off project’’ na piglansar kan Oktubre 1.

An grupo sa pangenot ninda Norita Martinez Badong, Presidente kan Kiwanis Club of Metro Naga asin Kwn. Sonny Rañola, miembro kan Sangguniang Panlungsod nagtukad sa upper barangay kan ciudad nganing magdonar nin mga pagkakan maging personal na kagamitan kan mga aki asin gurang.

Lunad sa truck an sinakong bagas, noodles, canned goods, adult asin children diapers asin dakul pang mga pangangaipo kan pobreng pig-aataman nin mga misyunaryo.

Dai na kaipuhan maghanap nin ayuda an mga misunaryo envez sinda na an pigdulok kan Kiwanis Club mantang kaipuhan an donasyon nganing isustenir kan saindang pagbuhay.

An opisyales nag-asumir sa puesto kan Oktubre 1 asin matapos an saindang termino sa Septiembre 30, 2021.

An bagong opisyales na nasa retrato sa pangenotan ni Badong, kinababalihan ninda Kwn. Ningning Albong, Kwn. Vons, Kwn. Efren Canlas, Kwn. Ice Badong asin Kwn. Rañola asin Lorena Celetaria, administrative officer kan Missionaries of the Poor.

Kick off project kan Kiwanis Club of Metro Naga piglansar sa paagi nin pagdonar nin mga pagkakan sa Missionaries of the Poor sa brgy. Cararayan.