RPC katuwang kan DA sa pagbakal nin tamang presyo kan paroy

Nagkapera nang cooperativa sa Camarines Sur nagbabakal na kan bagong aning paroy kan mga paraoma na mas halangkaw an presyo kumpara sa pribadong kumprada.

Sa pinaapod na miting ni Regional Executive Director Rodel Tornilla kan Department of Agriculture (DA) sa mga Rice Processing Center (RPC) na rehistradong cooperativa sa Cooperative Development Authority (CDA), hinagad kan direktor na tabangan an mga paraoma sa paagi kan pagbakal ninda kan paroy nin mga paraoma na mas halangkaw an presyo kumpara sa pribadong kumprador na nagdadalagan sana sa Php11 hasta Php12 an kilo.

Sinabi ni Emily Bordado, opisyal na parataram ka DA Bicol nag-aseguar an RPC dawa si bakong miembros kan cooperativa babakalon ninda sa tahaw kan reclamo kan paraoma na nalulugi na mantang binabagsak an presyo kan mga pribadong kumprador.

An lambang RPC tinawan nin on milyon pesos na ayuda kan DA nganing gamiton na kapital sa pagtungod nin paroy kan mga paraoma.

Sinda kumpleto nin mechanical dryer, mulinohan, palitada na puedeng baladan nin sagcod sa 60 toneladang paroy asin bodega.

Gabos sinda activong cooperativa asin igwang ‘‘management capability’’, sabi pa ni Bordado

Nagiging opurtunista an kumprador mantang halangkaw an produksyon nin paroy ngonian na huring cuarto kan 2020, sabi kan mga nagrereclamong paraoma.

Nagkaperang RPC na dakulang mga multi-purpose cooperative, igwa sa Libmanan, duwa sa Calabanga, Magarao gabos digdi sa CamSur asin an Camarines Sur Multi Purpose Coop na dating cooperativa kan mga empleados kan Capitolyo Provincial alagad nagsuhay nang grupo.

Afuera pa sa RPC yaon man an National Food Authority (NFA) na nagbabakal nin mas halangkaw na presyo Php19 cada kilo alagad dapat alang na.

An Camarines Sur iyo an tambubong nin paroy sa Kabikolan mala ngani binabaha na nin paroy an bodega kan NFA sa Palestina, Pili, CSur.

Aroaldaw inaabot sa 5,600 na cavan nin paroy an pigbabagsak digdi kan mga paraoma, sabi man ni NFA Assistant Provincial Manager Nora Follusco.

Pig-aatribuer an halangkaw na produksyon nin paroy sa Bicol nin huli sa campanya kan DA na maggamit nin hybrid seeds asin tinukdoan nin bagong mga teknolohiya an mga paraoma sa tabang kan ahencia. (DPAureus)