2.6 milyon metrico tonelada produksyon nin paroy sa Bicol

An Kabikolan na saro sa may halangkaw na produksyon nin paroy sa nasyon target na makakaproducir nin 2.6 milyon metrico tonelada (MT) hasta sa Deciembre 2020.

Nagpaseguro na nin Php112 milyon na alokasyon an National Food Authority (NFA) Bicol nganing ipadagos an saindang palay procurement program alagad andam an ahencia na dagdagan an alokasyon kun ini kinakaipuhan.

Sa estimate kan Department of Agriculture (DA) sa Bicol an 2.6 MT mas halangkaw ngonian na taon asin saindang piglalaoman mantang igwa pang nag-aaraning mga paraoma na mayoria dinadara na an saindang rinibong cavan nin paroy sa mga bodega kan NFA nin huli ta mas halangkaw an presyo kumpara sa pribadong kumprador na nag-aabot na sana nin Php11 hasta Php12 an cada kilo, sabi ni Emily Bordado an opisyal na parataram kan ahencia digdi sa rehiyon cinco.

Halangkaw an produksyon nin locally produced rice nin huli sa campanya kan DA sa mga paraoma na maggamit nin hydrid seeds asin tinukdoan nin mga bagong teknolihiya sa tabang kan ahencia.

Sinabi ni Edna De Guzman, regional manager kan NFA Bicol an Camarines Sur iyo an may pinakalangkaw na palay procurement mala ngani target na makabakal sinda nin 550 mil na cavan nin paroy hasta sa Deciembre 2020. An iba pang provincia na nagsusunod sa CamSur iyo an Sorsogon, Albay asin Camarines Norte.

An Rice Tariffication Law (RTL) iyo an pigdadahilan kan mga paraoma na naging causa kan bagsak presyo kan paroy asin naging paborable sa rice traders nganing mamaniobra an presyo kan paroy.

Sinabi man ni Silvestro Bonto, presidente kan National Confederation of Irrigators Association nagbaba an suplay nin bagas sa Filipinas nin huli kan rice smuggling na pigtutubodan an nasa likod digdi iyo an ibang rice traders sa nasyon.

An Filipinas iyo an world’s biggest rice importer ngonian na taon dawa naglaylo nin huli kan padagos na paglangkaw kan local production.

Sa pinaluwas na report kan United State Department of Agriculture-Foreign Agriculture Services pigpahayag na maabot sa 2.5 MT bagas an na-angkat kan Filipinas asin ini hasta sa Deciembre 2020.

An China, na igwang 1.4 bilyon na populasyon iyo an nag-iikaduwang may halangkaw na inaangkat na bagas na nag-aabot na sa 2.3 milyon na metrico tonelada.

An Filipinas dating may pinakadakulang pig-aangkat na bagas sa kinaban na nag-abot sa 2.3 MT matapos halion kan gobierno an limitasyon sa inaangkat na bagas. (DPAureus)