Dating pulis binadil gadan huli sa droga

Sarong AWOL (absent without leave) na pulis an binadil gadan sa ginibong drug buy-bust operations kan Oktubre 12 kan pinagsarong fuersa kan Philippine Drug Enforcement Agency asin Municipal Police Station kan PNP sa San Jose, Camarines Sur kan magprobar na magtumang sa mga awtoridad.

Si Police Capt. Chester Enriquez Jr. jefe de pulisya kan MPS San Jose, CSur nagpahayag an dating pulis pigbistong si Police Officer Vicente Pabon Imperial, residente kan barangay San Antonio, San Jose, CSur nabadil kan mga awtoridad kan magkaigwa sinda nin kumprontasyon asin nagprobar na magtumang mantang may sukbit man nin armas.

An operasyon ginibo mga alas diez nin banggui kan Lunes, Oktubre 12 sa barangay Del Carmen mantang haloy na ining suspechado na envuelto sa ilegal na droga.

Nakumfiscar sa biktima an 40 sadit na pidasong sachet nin shabu na may laog nin ilegal na droga alagad dai paman sinabi kun pera an cantidad mantang nagpapadagos pa an imbestigasyon.

Segun kan jefe de pulisya si Imperial nag-AWOL sa serbisyo sa PNP matapos mag-positivo sa ilegal na droga mantang mandato sa saindang organisasyon na dapat magpasa irarum sinda sa drug test kasunod kan kampanya kan saindang higher command na dapat punan an paglinig sa ilegal na droga sa laog kan PNP.

Nagkaperang veces na siyang pinaapod kan PNP Provincial Office kan Camarines Sur nganing mag-report sa saiyang trabajo asin mag-atubang sa imbestigasyon sa ilegal na droga alagad dai na nagbuelta sa trabajo.

Si Provincial Director P/Col Roderick Roy kan PNP Provincial Office kan CamSur nagpahayag nin pag-omaw sa mga miembro kan MPS San Jose, CSur asin PDEA matapos kan saindang operasyon laban sa wanted na dating pulis na envuelto na sa transaksyon sa droga.