SA LGU CAMARINES SUR: Covid-19 igwa nang special allocation sa 2021 budget

Pili, Camarines Sur --- An propuestong 2021 annual budget kan lokal na gobierno kan Camarines Sur nakatalaan magtagama nin special allocation para sa coronavirus disease 2021 asin posibleng apektado digdi an itatagaman dugang na fondo sa ibang mga departamento kan Capitolyo Provincial, sabi kan miembro kan Sangguniang Panlalawigan.

Si Vocal Angel Naval, vice chairman kan Committee on Appropriation kan SP nagpahayag sa Bicol Mail ini an mangyayari sa sunod na taon kumpara kan mga nakaaging annual budget na mayong special allocation sa pandemya.

Dai pang kasegurohan na matatapos na an pandemya sa masunod na taon asin dapat lang preparado an gobierno provincial mantang ngonian na 2020 nagkakaigwa sana nin asistencia finansyal sa Covid-19 kun igwang hali sa gobierno nasyonal, sabi pa ni Naval.

An gabos na LGUs sa nasyon kabali na an CamSur nawarasan nin dakulang fondo hali sa Bayanihan to Heal as One Act of 2020 na iyo an ginamit sa programa sa paglaban sa Covid-19.

Nurong taon nakapukos sa budget an provincia pandemya kun nakatipon nin fondo an provincia hali sa gobierno nasyonal alagad sa ngonian igwa nin ‘‘additional items’’ na mayo sa 2020 annual budget, sabi pa kan Vocal.

Nakatalaan isusumiter sa Sangguniang Panlalawigan ngonian na semana an executive budget hali sa opisina ni Gobernador Migz Villafuerte na kabali na an special allocation sa Covid- 19 alagad dai paman sinabi kun pera an propuestong fondo.

Duda an SP kun maiinan an mga budget sa cada opisina o departamento kan Capitolyo nin huli ta dapat tawan nin prioridad an special allocation sa Covid 19 sa tahaw kan nagbaba pa an koleksyon sa buwis mantang apektado man an mga negosyante kan pandemya.