‘‘World Foodless Day’’ iseselebrar kan AWFO

An Amihan Women’s Farmers Organization (AWFO) nakatalaan maglansar nin protesta sa atubangan kan Capitolyo Provincial sa Pili, Camarines Sur asin opisina rehiyonal kan Department of Agriculture (DA) nganing digdi ninda iselebrar an ‘‘World Foodless Day’’ envez kan dating World Food Day.

Nag-aandam na an miembros hali sa manlaen-laen na banwaan kan Camarines Sur asin suportado pa kan mga progresibong grupo sa saindang protest rally na gigibohon sa Oktubre 30.

Si Tess Ciello, pamayo kan AWFO nagsabi na mayor na isyu na saindang ipapaabot sa gobierno provincial asin DA iyo an kawaran nin suporta sa saindang sektor nganing mapalangkaw an produksyon agricultura.

Igwang pigsasabi an DA na tabang sa mga paraoma sa lindong kan Rice Tarrification Law (RTL) alagad ‘‘selected’’ sana man na pigtatawan nin prioridad an mga cooperativa. Maging man an gobierno provincial dapat maghiro man nganing makatabang sa pagpalankaw nin produksyon sa agricultura.

Nanindugan an AWFO dai man nakatabang sa mga paraoma an RTL envez an napa-asenso iyo an rice traders.

Nagparababa an presyo kan paroy mala ngani ngonian nagdadalagan na sana sa P11 hast P12 asin kan pigsasabing makakatabang alagad nagpalugi sa paraoma.

Liwat nindang ikukurahaw na dapat ibasura na kan Rice Tarrification Law mantang pasakit sana sa paraoma.

Sinabi pa ni Emily Bordado, parataram kan DA Bicol na milyones peso na nin cantidad nin makinarya an saindang na-itabang sa grupo kan paraoma.

Afuera kan saindang loan program, igwa pang libreng hybrid seeds asin libreng abuno.

Mala ngani halangkaw an produksyon kan locally produced rice asin target na makaproducer nin 2.6 milyon metric tonelada hasta sa huring aranihan nin paroy sa Deciembre 2020.

An halangkaw na produksyon nin paroy sa Bicol kasunod kan kampanya kan DA na mag-usar nin hybrid seeds asin tinutokdoan nin bagong teknolohiya an mga paraoma.

An DA nagtao pang ‘‘grant’’ nin on milyon pesos sa mga darakulang cooperativa nganing gamiton na fondo na magbakal nin halangkaw na presyo nin paroy kan mga paraoma na mas halangkaw sa pribadong kumprador.

Nagpabulos nin dakulang fondo an DA sa National Food Authority nganing ipadagos an palay procurement program sa presyong P19 cada kilo. (dpa)