DUAVIT TUMATAWO KAN CSUR 1ST DIST.: Petisyon kan opisyales lokal pinaboran kan Camara-Baja

PigdangoG kan bagong liderato kan Camara-Baja sa pamamayo kan bagong House Speaker Lord Allan Velasco an petisyon kan mayoriang opisyales lokal kan primer distrito kan Camarines Sur na si Congresista Michael John Duavit kan Rizal, kaalyado sa National People’s Coalition ni dating Majority Leader Rolando Andaya Jr. iyo an pinaboran na tumatawo kan distrito matapos bawian nin buhay si Congresswoman Marissa Lourdes M. Andaya kan Hunyo 5, 2020.

Kinumfirmar ni Consejal Noel Agravante kan Sangguniang Bayan nin Lupi, Camarines Sur an saindang grupo kan National People’s Coalition (NPC) hali sa mga municipalidades kan Ragay, Del Gallego, Lupi, Sipocot asin Cabuao nag-petisyon kan panahon ni dating Speaker Allan Peter Cayetano na hinahagad si Duavit iyo an gibohon na ‘‘caretaker’’ kan dating distrito ni dipuntong Congresista Andaya alagad an pig-borotohan iyo an dating speaker.

Si Duavit, iyo an national chairman kan NPC kapartido ni dating diputado Andaya Jr. asin nin huli kaini, madali siyang dulokon.

An saindang punto sa petisyon nin huli ta si Duavit bilang chairman kan NPC iyo an nababagay nganing si mga programa kan nagpa-aram na lehislador ipadagos asin ngonian marerealisar sa natatada pang labing sarong taon, sabi pa ni Agravante.

Epektivo ngonian na Oktubre 2020 an dugang na trabajo kan lehislador kan Rizal.

Piglalaoman na mabugtak nin coordinator sa distrito si Duavit nganing iyo an mag-aram kan mga kaipuhan asin proyecto na dapat iimplementar digdi.

An bagong liderato kan Camara-Baja, pigdesignar man si deputy speaker asin Sorsogon Congresswoman Evelina Escudero bilang legislative caretaker kan segundo distrito kan Sorsogon matapos bawian nin buhay an representante digdi na si Maria Bernardita Ramos huli sa coronavirus disease. (DPAureus)