NEGATIVO SA SWAB TEST: Alfelor positivo sa Covid-19, sabi sa social media

Ciudad nin Iriga – ‘‘Fake news’’ an nagluwas sa social media na positivo sa coronavirus disease (Covid-19) an alcalde kan ciudad na ini.

Si Alcalde Madel Gazmen Alfelor nagpahayag na mayong katutoohan an nagluwas sa social media na nagpositivo siya sa Covid- 19 matapos maolakitan kan empleados kan City Hall na nagpositivo sa virus.

Alagad saiyang inako na igwa sindang empleados na nagpositivo asin bilang pagpaseguro nagpa-cuarintina siya sa laog nin katorce diyas.

Nagpa-swab test asin an resulta negativo mala ngani saiya pang pig-post sa face book si resulta kan laboratoryo, sabi pa kan jefe ejecutivo.

‘‘Kun totoo man na positivo andam kung akoon sa publiko’’

Sa social media pinaluwas pa huli kan pagpositivo kan alcalde posibleng nahawaan niya an sarong bank manager na nagbisita sa City Hall kan Ciudad nin Iriga.

‘‘Unfair na man yan na ikalat sa tawo mantang dai ko ngani tinatago, hanga ako sa ginibo ni dating Alcalde John Bongat kan Ciudad nin Naga na piglangtad niya an saiyang pangaran kan magpositivo sa coronavirus disease’’.

Dai niya man nginaranan kun siisay an envuelto asin kun may motivo politikal.

Sinabi pa kan jefe ejecutivo na saiya nang pigpuponan an ‘‘Eye Contact’’ asin ini kabaeng kan eSalvar contact tracing App Ordinance kan Ciudad nin Naga.

Katuyohan kaini nganing mapadali an contact tracing na dakulang bagay sa pag-control kan paglakop kan virus mantang naglalangkaw an caso kan Covid-19 sa saindang ciudad.

Padagos na an ginigibong pagpa-rehistro kan mga residente kan Ciudad nin Iriga alagad an iba nagcocontra nin huli kan isyu sa privacy. (DPAureus)