Wage increase bubuhayon pakatapos kan pandemya

Ciudad nin Legazpi – Pueding maglangkaw o magbawas an P25 na wage increase na inaprobaran kan Regional Tripartite Wage and Productivity Board (RTWPB) sa Bicol alagad magdedepende sa liwat na pag-aadal oras na mawara na an pandemya.

Si Francia Ocmer, board secretary kan RTWPB nagpahayag iba an panahon sa ngonian asin posibleng igwang mga pagbabago nurong taon orog na kun matapos na an pandemya.

An posibilidad na maglangkaw o magbawas an P25 saro sana sa aspeto kan padagos nindang pag-aadal epekto pa kan pandemya.

Saiyang sinabi an pinakahuring Wage Order No. 20 na aprobaran kan Marso 6, 2020, alagad dai nakumfirmar kan National Wages and Productivity Commission (NWPC) kan central office kan Department of Labor and Employment (DOLE).

Afuera pa kaini, an wage increase dai pa napublicar sa peryodiko lokal na igwang general circulation, sabi pa.

Saro pa sa naging magabat na dahilan na dai ma-iimplementar dakul na mga establisimiento de negosyo sa Bicol an temporaryo nang sara asin nagbawas nin mga empleados nin huli ta nagkaralugi epekto pa kan pandemya.

Kun naging epektibo an bagong wage order an mga empleado sa pribadong sektor marecibe nin dugang na P25 na aldiya, na dapat itao duwang ‘‘tranches’’ an enot kan Abril dapat P15 asin kan Hulyo P10.

Sa presente, an empleados sa rehiyon cinco nagrerecibe nin P310 an aldiya base sa Wage Order No. 19 na nag-epekto kan Septiembre 21, 2018.

Sinabi pa kan RTWPB igwa sindang pigbasehan na kretirya antes inaaprobaran an dugang na sueldo kabali na an pagconsiderar kan pangangaipo kan obreros.

Alagad igwa sindang pigcoconsiderar na paktor sa paghaman nin desisyon sa wage increase arog kan pagbabalanse kan pangangaipo kan trabajador asin capacidad sa kakayahan sa pagbayad kan employer o kumpanya.

An junta igwang representantes hali sa sektor nin obreros asin miembros sa employers confederation nganing makahaman nin desisyon sa wage increase. (dpa)