Casureco II nakabangon sa bagsak na koleksyon

Nakakabangon na an Camarines Sur II Electric Cooperative (Casureco II) na nagbagsak sa haros 60 por ciento an collection efficiency nin huli kan perang bulan nang epekto kan pandemya.

Alagad an naging solusyon iyo an lagduan na pagputol kan serbisyo nin kuryente sa mga miembros-consumedores na may perang bulan nang morosidad asin an iba antes pa kan pagtama kan pandemya.

Si Rinner Bucay, opisyal na parataram kan Casureco II nagpahayag na piglansar ninda an massive disconnections puon kan bulan nin Septiembre mala ngani an resulta nakaangat an manijamiento sa 98 por cientong collection efficiency.

Dakul an nagtuyo sa saindang collection centers nganing magbayad kan morosidad kaya biglang nagsakat sa 98 por ciento kan Septiembre an saindang collection efficiency, sabi pa ni Bucay.

Saiyang pig-osipon na puon kan Marso, Abril, Mayo, Hunyo, Hulyo asin Agosto na panahon kan pandemya asin yaon pa an mga pig-iimponer na mga lockdown nin huli kan community quarantine haros lakma an saindang koleksyon.

Nagpadara sinda nin mga notice of disconnection antes pig-implementar an massive disconnections sa ribo-ribong miembros-consumedores sa coverage area kan cooperativa na kinakabalihan kan Siruma-Tinambac district, Calabanga district, Bombon district, Magarao district, Canaman district, North asin South district sa Ciudad nin Naga, Milaor district, Pili district asin Minalabac district.

SA PATANID KAN ERC

Nahahadit an manijamiento kan cooperativa sa posibleng magparabagsak liwat an saindang collection efficiency oras na magpaluwas nin memorandum an Energy Regulatory Commission (ERC), na ibawal an pagputol nin linya kan kuryente sa mga consumedores na dai nakakabayad kan saindang electric bill.

An ERC nagpaluwas nin pahayag na mapaluwas sinda nin memorandum sa 121 mga cooperativa nin electricidad sa nasyon na pundohon an implementasyon kan ‘‘disconnections’’ hasta sa Deciembre 2020 huli kan pandemya mantang apektado an consumedores kan pagbuhay huli kan pandemya.

Alagad sinabi pa ni Bucay sagcod sa ngonian dai pa ninda narerecibe an pigsasabing ipapaluwas na memorandum kan ERC. (DPAureus)