RTL ibasura, bakong pautang sa mga LGU

An pagbasura kan Rice Tariffication Law (RTL) iyo an maninigong solusyon kan gobierno envez kan plano kan Land Bank of the Philippines (LBP) na pautangon an mga lokal na gobierno nganing iyo na an magbakal kan paroy nin mga paraoma sa mas halangaw an presyo sa pribadong kumprador.

Si Tess Cielo, pamayo kan Amihan Women’s Farmers Organization (AWFO) sa Camarines Sur nagpahayag kaini kasunod kan dai palang nahahaloy inaprobaran na P4.3 bilyon nganing ipautang kan LBP sa mga LGUs para gamiton sa pambakal nin paroy kan paraoma na dapat mas halangkaw an presyo kumpara sa pribadong kumprador.

Puon kan Septiembre hasta ngonian na bulan nin Oktubre 2020 nagparabagsak an presyo kan paroy nagcacantidad na sana nin P11.00 hasta P12.00 an kilo.

Nalulugi na an paraoma sa arog kaining presyo epekto kan RTL alagad an nakikinabang iyo an darakulang rice traders asin nadadagdagan pa kan mga rice smugglers.

Mahal an presyo kan palay seedlings, dakula an gastos sa abuno, insecticides, pagpatrabajo asin thresher alagad dai ini naheheling kan gobierno mas tinatawan nin pabor an rice traders na iyo an mas lalong nag-aasenso, sabi pa.

Sinabi pa ni Cielo dai pa na-aaprobaran ni Presidente Rodrigo Duterte an Rice Tariffication Law pusog na pigcocontra kan mga paraoma maging iba pang sektor asin kan mga opisyales kan National Food Authority. Alagad apesar kan mahiwas na pagcontra, idinagos ni Presidente Duterte an pagpirma nganing maging ley an RTL.

Si Senador Cythia Villar, Chairman kan Committee on Agriculture sa senado iyo an principal na padreno kan RTL alagad an saiyang naheheling na solusyon sa problema na dapat suspendiron an Rice Tariffication Law kun panahon nin aranihan.

An Department of Agriculture saindang inaalok an mga paraoma na darahon sa NFA an saindang paroy huli ta mas halangkaw an presyo sa cantidad na P19.00 an kilo alagad kaipuhan alang.

Cada panahon nin aranihan grabe an aggrangay kan mga paraoma nin huli sa hababaon na presyo alagad mayo man nagiginibo an gobierno, sabi pa kan AWFO.