SA AGRICULTURA: P38.4-M winalat na danyos ni “Quinta”

Aanihon na sanang paroy sa Ocampo, Camarines Sur pinahakpa pa ni bagong Quinta.

Maabot na sa P38.4 milyon an partial damaged report sa produksyon sa agricultura sa Bicol asin kabali digdi an agricultural infrastructure kan Department of Agriculture (DA), na winalat na destroso kan paglamasa ni bagyong ‘Quinta’ sa rehiyon.

Ini an inisyal na report sagcod kan Martes alas 5:00 nin hapon, Oktubre 27 hali sa mga provincia kan Albay, Camarines Sur asin Masbate alagad an dakulang nadestroso si mga madali nang anihon na paroy asin an iba nagbabados pa sana.

Si Emily Bordado, opisyal na parataram kan DA sa Bicol nagpahayag na nagsakat na sa cantidad P22.2 milyon an destroso sa paroyan na igwang 1,042 metrico tonelada sa 515.43 na hektarya sa tolo pa sanang provincia mantang hinahalat pa an ibang report.

Sa corn plantations apektado an 266.11 hektarya asin maabot sa P5.7 milyon si cantidad kan destroso; sa high value crops apektado man an 20.85 hektarya na nagcacantidad nin P7 milyon; sa live stock – P818,000 asin ini si inisyal na report na danyos asin kabali digdi an nagadan na sarong baca asin sa poultry farm; asin sa property and infrastructure nag-aabot sana sa P340,000.

Sinabi pa ni Bordado na andam magtabang an saindang ahencia sa mga apektadong paraoma mantang igwa nang naka-andam na mga banhi sa paroy, mais, gulayon, abuno asin animal dispersal.

Hinahalat pa kan DA an iba pang mga damaged report hali sa ibang mga provincia kan Bicol asin piglalaom na malangkaw pa an cantidad kan destroso sa nakaaging calamidad. (dpa)