Catanduanes naatehan na nin relief goods

Nagkukulang na nin relief goods an LGUs kan Catanduanes mantang igwa man calamity fund alagad haros ma-ubos na an fondo na ginagastos sa pandemya asin posibleng magutom an ribo-ribong evacuees.

An Catanduanes iyo an enot na binagsakan sa mga provincia sa Bicol kan super typhoon ‘‘Rolly’’ na may patus-patos na 225 kph an kusog kan duros na dakula si destroso sa agricultura asin sa serbisyo sa electricidad.

Alagad nagpangako na an Malacañan na mapadarang ayuda para sa mga evacuees asin an Department of Social Welfare and Development (DSWD) Bicol.

Ini an mga pahayag sa media ni Gobernador Joseph Cua kan Catanduanes alagad saiya pang dinagdag bako sana ini an sasapuon na problema envez an piglalaoman na halawig na brownout mantang haros radason na binungkal an mga poste kan saindang cooperativa nin electricidad, bagsak pa an serbisyo kan smart asin globe telcos.

Dakula an destroso sa agricultura, hayopan asin infrastractura alagad dai pa makumpleto an report huli kan kawaran nin kamunikasyon mantang bagsak an duwang telcos.

An nagagamit sana ngonian kan Capitolyo Provincial kan Catanduanes iyo an pinasubleng satellite phone kan Department of National Defense (DND).

An provincia na igwang onseng mga municipalidad maabot na sa quince mil na apektadong familia na igwang sa maabot sa 69 mil na indibduwal.

Sagcod kasuodma paralisado pa an transportasyon maging an aeropuerto dai pa maaraman kun nuarin mabuelta an regular na operasyon.

An mga evacuees nakawarak na sa mga classroom kan Department of Education asin estrictong pinapasunod an health protocol sa paglikay sa caso sa coronavirus disease, sabi pa ni Cua.