CSur, Naga nagdeclara na nin state of calamity

Nasa state of calamity na an Camarines Sur asin Ciudad nin Naga matapos kan dakulang destroso kan paglamasa kan super typhoon ‘‘Rolly’’ nganing magamit an saindang fondo sa calamidad sa huring cuarto ngonian na taon para sa rehabilitasyon asin tabang sa mga apektado kan calamidad.

Sa Sangguniang Panlalawigan kan CamSur, sinabi ni Vokal Angel Naval kan tercer distrito kan provincia saindang pinasar an resolusyon na nagdedeclara sa estado nin calamidad kan provincia sa ginibong sesyon espesyal kan Lunes, Noviembre 2 mantang sa ciudad sa ginibong regular na sesyon kan Martes, Noviembre 3.

Dakula si destroso sa agricultura kabali na si aanihon nang paroy, infrastractura asin sa mga propriedad kan gobierno mantang pigtitiripon pa kan Provincial Disaster Risk Reduction Management Council an cantidad kan milyones peso na danyos asin maabot sa 80 mil na mga evacuees.

Duwa an binawian nin buhay sa provincia an saro iyo an tumatawo kan M/B Camaligan matapos magbaliktad ini sagcod na nagsumosumo sa tubig kan Bicol River asin an ika-duwa iyo an sarong construction worker sa Canaman, CSur.

Sa Ciudad nin Naga, sinabi ni Bise Alcalde Nene De Asis naging ‘‘joint and collective motion’’ an resolusyon mantang igwa pang fondo sa calamidad dawa na ngani nagamit na an iba nin huli kan pandemya.

Dakula an destroso sa ciudad na kinababalihan kan agricultura nagcacantidad P12.7 milyon; P367.8 – M sa infrastractura; P11-M sa mga CCTV camera; P1.5-M sa mga street lights alagad gabos inisyal pa ini mantang nagpapadagos pa an inbentaryo.

Sa sampulong mga banwaan na sakop kan Casureco II an ciudad iyo an may dakulang destroso na nag-aabot na sa 215 poste asin mga linya nin kuryente an pinalakma kan calamidad.

Si Bise Presidente Leni Robredo pigheheling an nadestrosong mga harong sa coastline kan brgy. Sabang, Calabanga, CSur na tinamaan kan sadit na storm surge. Mayo sa retrato an ginibong distribusyon nin mga relief goods na dara kan bise presidente kaibanan si Congresista Gabby Bordado kan tercer distrito kan CamSur. (Rappler)