Pagpalista sa Comelec CSur liwat sinuspende

Dapat buelta na kan Martes, Noviembre 3, 2020 an continuing registration nin mga votante sa Commission on Election (Comelec), temporaryong suspendido muna sa mga lugar na apektado kan halawig na brownout alagad si mga municipalidad na igwa nang suplay nin kuryente puede nang magpadagos.

Gabos na mga opisina lokal kan Comelec naggagamit na nin computerized registration mantang mayo nang manwal na pagpalista envez gamit na an biometric.

Ini an mga pahayag ni Election Officer Abogado Maico Julia Jr. kan Ciudad nin Naga asin opisyal na parataram kan Comelec Camarines Sur matapos enot nang sinuspende kan Oktubre 31 nin huli kan ‘Undas’’ na dapat buelta sinda kan Noviembre 3, 2020 alagad haros gabos na mga banwaan mayo nin suplay nin kuryente matapos maglamasa sa Bicol an super typhoon ‘‘Rolly’’.

Dakul si destroso sa mga poste asin linya kan kuryente kan apat na Camarines Sur Electric Cooperative na pinaturomba kan makusog na bagyong Rolly, mayo pang talaan kun nuarin matatapos an rehabilitasyon kan mga poste asin linya maging sa National Grid Corporation of the Philippines (NGCP) apektado man kan nakaaging calamidad.

Enot nang sinabi kan mga cooperativa nin electricidad na nakatabang si pagpurotol kan mga puon nin kahoy sa gilid kan mga tinampo na hagop kan road widening project kan Department of Public Works and Highways (DPWH) kan nakaagi pa sanang bagyong ‘‘Quinta’’ na kulang si nadestrosong mga poste alagad dai man giraray pinatawad kan nakaaging super typhoon.

Igwa pang mga lugar na turomba pa an mga poste na iyo an causa kan abalang suplay nin kuryente.