Prayer rally laban sa NPA

Bako sa bala envez pinaagi sa prayer rally/candle lighting an ginibo kan Naga City Police (NCPO) nganing kundenaron an Communist Party of the Philippines (CPP) asin New People’s Army (NPA) nin huli kan padagos na paghasok nin kariribokan sa nasyon.

An actividad ginibo sa Plaza Quezon kan Ciudad nin Naga kan Viernes, Oktubre 30, 2020 na pinangenotan ni City Director Col. Marlo Catan kan NCPO asin pigparticiparan kan maabot sa quinceng rebel returnees (RR).

An prayer rally sarong matuninong na paagi nganing hagadon an suporta kan comunidad asin kan jovenes na sainda nang isikwal an suporta sa CPP/NPA asin sa arin man na organisasyon kan makawalang grupo.

Mga jovenes iyo na ngonian an bagong pigkakalap kan kumunistang grupo na madaling maconbensir nganing mag-ayon sa organisasyon kan rebeldeng grupo.

An mga dating rebelde (RR) nagpahayag man kan saindang pagkundenar sa mga rebelde sagcod na napiritan na magtalikod sa grupo nin huli ta puros kapagalan asin nagugutom pa sinda sa pakikipaglaban sa gobierno asin mayo sindang futuro sa mga maabot na panahon.

An CPP/NPA, inaapod na kan establisimiento militar na teroristang grupo nin huli kan mga panghahasok sana nin kariribokan sagcod nang bibiktima pang inosenteng tawo.

Sa ibang mga PNP Provincial Office asin Police Station nagkaigwa man kan saindang suhay na mga indignation rally na pigparticiparan kan mga opisyales de barangay asin iba pang mga sektor.

An kaparejong mga actividad ginigibo man kan Fuersa Armada kan Filipinas bilang saindang propaganda laban sa CPP/NPA matapos maaprobaran an Anti-Terrorism Law ni Presidente Rodrigo Duterte.

Saro pa sa saindang ginigibo iyo an red tagging sa mga activista maging sa iba pang Party-list Representive na pig-aakusaran kan militar na front kan kumunistang grupo.

Alagad an mga akusasyon na ini pigkukundenar man kan mga activista asin lehislador.