SA CASURECO II: P11.6M danyos, suplay nin kuryente antes kan Pasko

Retrato sa itaas pigheheling ni Asst. District Engr. Ricardo Ragragio kan 3rd Engineering District kan DPWH CamSur an ipapaputol na natumbang puon nin kahoy sa nat’l road sa Brgy. Pacol, Ciudad nin Naga matapos kan bagyong ‘’Rolly’’. Sa ibabang retrato mga trabajador kan DPWH asin personajes asin opisyales de barangay kan Pacol sa pamamayo ni PB Josue Perez nagtatarabang nganing mahale an dakulang kahoy sa tinampo asin maagihan nin mga vehiculo. (DPAureus)

Maabot sa P11.6-M an naging destroso sa Camarines Sur II Electric Cooperative (Casureco II) sa pigkakarkulong 700 na mga pinatumbang poste asin linya nin kuryente kan maglamasa sa Bicol an super typhoon ‘‘Rolly’’ na maresulta nin halawig na mayo nin suplay nin kuryente na posibleng macumpleto o 100% an suplay nin kuryente an enterong sakop na banwaan kan cooperativa antes kan Pasko.

Nag-order na nin enot na 300 na bagong poste sa National Electrification Administration (NEA) mantang sa inisyal na report igwa nang nabilang na 430 natumbang mga poste asin piglalaoman na malangkaw pa ini sagcod sa 700 alagad matatawan nin prioridad na ma-enot iyo an centrong lugar huli ta kulang an danyos sa primary lines.

Alagad pig-aandaman naman an sunod na order na 200 na poste mantang nagpapadagos na an rehabilitasyon kan mga linya asin poste asin pigtatawan muna nin prioridad an centrong mga lugar na daing gayo apektado an mga linya.

Ini an mga pahayag ni Rinner Bucay, opisyal na parataram kan Casureco II alagad hinahagad kan manijamiento sa ribo-ribong consumedores na magbayad na kan saindang mga power bill nganing igwang fondo sa rehabilitasyon kan mga linya asin dai na mag-utang sa NEA.

An Ciudad nin Naga iyo an may dakulang destroso sa poste na igwang inisyal na 213 alagad an 100 kaini hali sa upper barangay kan ciudad na kinababalihan puon sa brgy. San Felipe, Pacol, Carolina, Panicuason, Cararayan asin San Isidro.

An iba pang mga banwaan sa coverage area kan Casureco II na natumbahan nin mga poste asin linya nin kuryente alagad inisyal pa sana an nakukuang report kan manijamiento kinababalihan kan Calabanga – 67 poste; Minalabac – 50 poste; Pili – 27 poste; Milaor – 25 poste; Magarao – 21 poste; Tinambac – 13 poste; Bombon – 9 na poste; Canaman – 3 poste; asin Siruma – 2 poste.

Nakadaplang poste kan Casureco II sa Kilometro 6 kan brgy. Pacol kabali sa maabot sa sangatos na posteng pinatumba kan bagyong ‘Rolly’ sa upper na mga barangay kan Ciudad nin Naga. (Dars)

Alagad ngonian na semana mapapabulosan na nin suplay nin kuryente an kalabaan kan Panganiban Drive asin sa centro kan Ciudad nin Naga, ini matapos mag-asegurar an National Grid Corporation of the Philippines na sa laog nin duwa hasta sa tolong aldaw mapabulosan na sinda nin suplay nin kuryente an sub-station.

Dakula si destroso kan nakaaging super typhoon kumpara kan nakakalipas pa sanang ‘‘Quinta’’ na maabot sa P7-M, sabi pa ni Bucay.

Naibuelta na nin 100 por ciento si suplay nin kuryente matapos kan bagong ‘Quinta’ alagad nagsunod an makusog na bagyo.

Maging sa mga Casureco I, III asin IV milyones peso man si destroso na mayor na apektado an mga natumbang poste asin linya na posibleng lampas pa sa sarong bulan antes maibuelta sa 100 por ciento an serbisyo sa mga miembros-consumedores. (DPA)