Magtururogang gadan sa nasulong apartment


Nasusulong limang unit nin apartment sa barangay Vanagre, Tigaon, Camarines Sur na pitong magparamilya an binawian nin buhay kan dai na makaluwas sa saindang pigtuturogan na ika-duwang escalon. Sa toong retrato si mga nakuang bangkay kan mga awtoridad. (BFP Tigaon)


Tigaon, Camarines Sur --- Limang oras matapos okuparon an Door No. 2 kan limang unit na apartment sa barangay Vanagre sa banwaan na ini binawian nin buhay an pitong magturogang kabali na an aki asin esposo kan dai na makaluwas sa nasusulong apartment an mga biktima.

Alas 6:00 nin banggui, Noviembre 8 kan saindang okuparon an apartment alagad mantang tururog na mga alas 11:15 nin banggui kan kaparejong petsa nagbungkaras an kalayo huli sa napabayaan na kandila, nakaabot man an mga bombero naglalaila na an makusog na kalayo hali sa groundfloor.

Si SF01 Jonathan Boncodin, inbestigador kan Bureau of Fire Protection (BFP) kan Tigaon Fire Station, nagpahayag an mga biktima pigbisto na sinda Jason Verdejo, 25 anyos an saiyang esposa Angelica Cea y Banaria, 23 anyos an saiyang mga tugang na sinda Gerald, 13 anyos; Leana Isabel – 7 anyos, Alliah Cristina – 6 anyos; Arch Jay Don Verdejo – 3 anyos aki kan mag-agom na Jason asin Angelica asin saro pang dai mabisto kan mga awtoridad.

Sa inbestigasyon nagluluwas na causa kan kalayo iyo an napabayaan na kandila mantang mayong suplay nin kuryente sa Camarines Sur Electric Cooperative (Casureco IV) matapos kan super typhoon ‘Rolly’.

Pigkakarkulo kan BFP na maabot sa P1 milyon an danyos kan kasulo.

Marikas na nagsakat sa ika-duwang escalon an kalayo na digdi nag-tuturorog an mga biktima asin dai na nakaluwas dawa igwa man nin fire exit, sabi pa kan BFP.

Magiging mamundo an pagpuli kan ina ni Angelica nin huli ta yaon sa abroad asin mapuli na maheheling an makangirat na aksidente sa saiyang familia.

Sa Tigaon Muncipal Police Station, sinabi ni Pol. Major Chester Pomar jefe de pulisiya digdi na nagkukunduciran man giraray nin suhay na inbestigasyon an SOCO asin saindang hinahalat an resulta.