P18-M danyos ni ‘Quinta’, ‘Rolly’ sa Casureco Uno

Libmanan, Camarines Sur – An Camarines Sur I Electric Cooperative (Casureco I) dikit si naging destroso sa mga poste asin linya nin kuryente kan magrapado an super typhoon ‘’Rolly’’ sa Bicol kumpara sa ibang cooperativa nin electricidad sa Camarines Sur mala ngani sa partial damaged report nag-aabot na sa P18.6 milyon kabali na si nakaaging bagyong ‘’Quinta’’. Piglalaoman madugang naman an danyos huli kan nakaaging bagyong Ulysses.

Nagpahunod na sinda kan mga task force nin mga cooperativa nin electricidad (ECs) hali sa ibang rehiyon nganing maging katuwang sa power restoration sa ibang mga ECs na mas grabe an danyos kan nakaaging calamidad.

Sinabi ni General Manager Ana Sylvia Alsisto dai pa naabot an calamidad sa Bicol igwa na sindang mga kaulay na kontratista na kumpleto na nin mga heavy equipment nganing saindang maging katuwang sa rehabilitasyon kan mga poste asin linya nin kuryente.

Katuwang man ninda an Camarines Norte Electric Cooperative (Canoreco) na nag-abot kan Domingo, Noviembre 8.

Alagad igwang 300 na mga poste an nagtagilid sana na puedeng mapabulosan tolos nin suplay nin kuryente asin maabot man sa 160 poste an nadestroso kabali na an saindang mga linya.

Sa ngonian an mga metro Poblacion pa sana kan mga banwaan sa sakop kan saindang cooperativa an igwa nang suplay nin kuryente mantang sa mga barangay iyo na an isusunod nin huli ta kaipuhan seguradohon an mga linya nganing maibitaran an aksidente.

Pinahayag pa kan general manager na dai ngani nagsarong semana matapos kan calamidad sainda nang pig-andaman an paglaog kan suplay nin kuryente hali sa National Grid Corporation of the Philippines (NGCP) asin kan Sabado, Noviembre 7 igwa nang mga kuryente sa centrong barangay.

Mientras tanto, sa Casureco II na igwang 950 mga poste asin linya nin kuryente an nadestroso kan bagyo nagpapadagos kan saindang rehabilitasyon kan mga linya asin katuwang ninda an Task Force hali sa Ilocos Norte Electric Cooperative, Pangasinan Electric Cooperative, Ilocos Sur asin Peninsula Electric Cooperatives.

Nagsakat na sa Php32 milyon an inisyal na natipon nindang damaged report mantang piglalaoman na malangkaw pa ini.

An centro pa sanang mga barangay sa Ciudad nin Naga igwa na nin suplay nin kuryente asin Pili, CSur asin limitado pa sa ibang mga banwaan sa coverage area kan Casureco II. (dpa)