Pagbuelta kan viajeng Manila- Bicol pendiente pa sa IATF

Apektado an ribo-ribong pasajeros na haling Manila asin iba pang lugar nganing magpuli sa Bicol antes kan Noviembre 5, 2020 maging antes kan Oktubre 29 nganing magbisita sa kamposanto kan saindang mga mahal sa buhay na nagtalikod na sa kinaban.

Premirong semana pa kan Oktubre pig-endorsar na kan Local Transportation Regulatory and Franchising Board asin kan lokal na gobierno kan Ciudad nin Naga maging kan Land Transportation Franchising and Regulatory Board (LTFRB) Bicol an pagbukas liwat kan inter-regional routes alagad sagcod sa ngonian pendiente pa asin mayo pang paliwanag an Inter-Agency Task Force (IATF).

An IATF nagpaluwas nin resolusyon numerado 70 na bukas an mga kamposanto sa publiko puon kan Oktubre 1 hasta 29 alagad limitado sana sa treinta por ciento alagad sa Oktubre 29 hasta Noviembre 4, naka-lock down, alagad bukas liwat an mga kamposanto sa Noviembre 5.

Si Roderick ‘‘Nonoy’’ Reforsado, operations manager kan Bicol Central Station sa Ciudad nin Naga nagsabi sagcod kasuodma mayo pa sindang narerecibing kumfirmasyon sa LTFRB asin IATF kun nuarin aaprobaran an inter-regional routes.

Sa desisyon kan City’s Health Emergency Response Task Force (HERTF), sinabi ni alcalde Nelson Legacion na dapat tawan nin kunsiderasyon an pagbuelta kan provincial buses alagad kaipuhan estrictong iimplementar an health protocols sa locally stranded individuals (LSIs) asin Overseas Filipino Workers (OFW) sa saindang pag-abot sa Manila asin pagabot sa ciudad.

Si dating Bicol PNP regional director asin retiradong Brig. General Antonio Gardiola nagpahayag base sa LTFRB Memorandum Circular No. 2020-051 nagtutugot na sa pagbuelta sa operasyon kan viaje kan buses sa provincias haling Manila asin pasiring sa iba pang provincin vice versa alagad kaipuhan an pagtugot kan LGUs asin sa koordinasyon sa Inter-Agency Task Force (IATF).

Nagkapera nang mga provincia sa Central Luzon an tinugotan na kan LTFRB alagad sa viajeng Manila-Bicol padagos pang pendiente.

Sinabi pa ni Reforsado na preparado na an BCS sa saindang iimplementar na health protocol oras na tugotan na an inter-regional routes.

Sa ngonian an regular na viaje pa sanang buses haling Camarines Sur pasiring sa Albay asin Sorsogon, vice versa asin lokal na mga viaje kan buses sa laog kan provincia.

Mga nakagarahing buses sa Bicol Central Station pitong bulan nang dai tinutugotan kan LTFRB asin IATFna magkayod viajeng Bicol-Manila vice versa epekto pa kan pandemya. (dpa)